Առաջիկա ամիսներին Հնդկաստանում կմեկնարկի հրացանների ձեռքբերման մրցույթը, որի հաղթողն էլ կմատակարարի զինված ուժերի հետևակային զորքերի մի մասը: Մրցույթի հաղթողը Հնդկաստանի զինված ուժերին կմատակարարի 66 000 հրացան՝ 300 միլիոն ամերիկյան դոլար ընդհանուր արժողությամբ: Այս մասին հաղորդում է լեհական Defense 24 ռազմական լրատվակայքը:
հնդկական INSAS հրացանը
Մրցույթը, որի անցկացումը նախկինում բազմիցս հետաձգվել է, նպատակ ունի մասնակից չորս ընկերությունների ներկայացրած հրացանների փորձարկման արդյունքում պարզել, թե դրանցից որն է ամենանպատակահարմարը հնդկական զինուժի կարիքների բավարարման համար: Նման խնդրի առաջ Հնդկաստանը կանգնել է դեռևս 2011-ից, երբ տեղական արտադրության INSAS (Indian National Small Arms System) հրացանը, որը զինված ուժերի սպառազինությունում է 1998-ից, դարձավ բազմաթիվ բողոքների պատճառ զինվորականների շրջանում՝ անհուսալիության և այլ թերությունների պատճառով:
Ներկայումս որպես INSAS հրացանի ժամանակավոր փոխարինման միջոց ընտրվել են Կալաշնիկովի ինքնաձիգն ու բելգիական FN FAL հրացանը: Մրցույթի արդյունքում պարզ կդառնա, թե ապագայում որ հրացանով են համալրվելու Հնդկաստանի ԶՈւ ստորաբաժանումները: Հաղթող կողմը ոչ միայն կիրականացնի հրացանների նախնական մատակարարում, այլև կպարտավորվի հիմնել դրանց արտադրությունը Հնդկաստանում:
չեխական CZ 807A Bren հրացանը
Մրցույթին մասնակցում են չեխական Ceskiej Zbrojovki ընկերությունը չեխական բանակի սպառազինությունում առկա CZ 807A Bren հրացանով, իսրայելական Israel Weapon Industries ընկերությունն իր ACE հրացանով, իտալական Beretta ըկերությունն իր ARX-160 հրացանով և ամերիկյան Colt-ը՝ ACR (Advanced Combat Rifle) հրացանով:
Մրցույթի ընթացքում կփորձարկվեն ինչպես հրացանների հրաձգային բնութագրերը, այնպես էլ դիմացկունության աստիճանը: Հնդկական INSAS հրացաններն, օրինակ չէին արդարացրել իրենց հիմալայան կլիմայական պայմաններում, քանի որ դրանց որոշ դետալներ սառում էին, ինչն ուղղակիորեն անդրադառնում էր հրացանի հուսալիության վրա: Նման խնդիրներից խուսափելու համար թեկնածու հրացանների փորձարկումները կանցկացվեն ինչպես Հիմալայան լեռներում, այնպես էլ Հնդկաստանի հարավային շրջաններում, որտեղ կլիման չափազանց խոնավ է:
Հավելենք, որ հրացանների փորձարկման գործընթացը մեկնարկելու է գարնանը և նախնական տվյալներով տևելու է մի քանի ամիս: