Հնդկական ռազմածովային ուժերը Trikand ֆրեգատից 2 գերձայնային BrahMos հրթիռների համազարկային արձակում է կատարել Հնդկաստանի ափերի մոտ։ Հրթիռներն արձակել են 3 վայրկյանի տարբերությամբ։
Փորձարկումն, ըստ ԻՏԱՐ-ՏԱՍՍ գործակալության, հաջողությամբ է ավարտվել։ Առաջին հրթիռը խոցել է թիրախն, իսկ երկրորդը թռչել է տրված ուղեգծով։ Հնդկական կողմը հայտնում է, որ սա գերձայնային հրթիռների առաջին համազարկային արձակումն է։
Հնդկաստանի ու Ռուսաստանի համատեղ նախագծման BrahMos գերձայնային հրթիռը
Արձակված BrahMos հրթիռները համատեղ նախագծել ու արտադրում են Ռուսաստանն ու Հնդկաստանը։ Հրթիռների նախագծումը կատարել են 1998-ից սկսած, իսկ առաջին անգամ ներկայացրել են 2006-ին։
Ներկայումս այս հրթիռներից մի քանի հարյուր միավոր առկա է Հնդկաստանի զինված ուժերի սպառազինության մեջ։ Ստեղծվել են հրթիռի մի շարք արդիականացումներ մակերևույթից, օդից ու սուզանավերից արձակման համար։
Հրթիռի զանգվածը 3 տոննա է (օդից արձակվող տարբերակը՝ 2,5 տոննա), իսկ մարտական մասի զանգվածը՝ 250-300 կգ, հրթիռը կարող է տեղափոխել նաև միջուկային մարտագլխիկ։ Հրթիռի թռիչքի առավելագույն բարձրությունը 15 կմ է, առավելագույն հեռավորությունը՝ 300 կմ։ Հրթիռը թռչում է ձայնի արագությունը 2 անգամ գերազանցող արագությամբ, իսկ առավել մեծ բարձրություններում՝ շուրջ 750 մ/վ արագությամբ։