Ռուսաստանի նախագահ Վլադիմիր Պուտինը փետրվարի 3-ին հաստատել է Պետդումայի ընդունած օրինագիծը զինված ուժերում ռազմական ոստիկանության ստեղծման մասին: Օրինագծում հստակ սահմանվել են այն գործառույթները, որոնք այսուհետ իրականացնելու է ռազմական ոստիկանությունը:
ՌԴ ԶՈւ ռազմական ոստիկանություն
Ըստ այդմ, նորաստեղծ կառույցը զինծառայողների շրջանում ապահովելու է օրինականություն, կարգապահություն, ռազմական օբյեկտների պահպանություն և զինտեխնիկայի ճանապարհային երթի անվտանգություն: Նորաստեղծ կառույցը ենթարկվելու է անմիջականորեն պաշտպանության նախարարին:
Այսուհետ ռազմական ոստիկաններն են նաև սահմանելու զինծառայողների պատժաչափերը և կայազորի հրամանատարների հետ մեկտեղ զինծառայողներին ներկայացնելու են խրախուսանքի: Նախնական փուլում ռազմական ոստիկանության անձնակազմը լինելու է 6 500 հոգի:
Պետդումայում այս կառույցի ստեղծման օրինագծի քննարկման ժամանակ դրա հեղինակները նշել են, որ այսուհետ զորամասերի և կայազորների հրամանատարները ստիպված չեն լինի զբաղվել անձնակազմի կարգապահությանն առնչվող հարցերով, ինչը նրանց հնարավորություն կտա կենտրոնանալ իրենց անմիջական պարտականությունների պատշաճ կատարման վրա:
Նշենք, որ ներկայումս ՌԴ զինված ուժերում անձնակազմի կարգուկանոնի պահպանումը հսկում է զինվորական պարետատունը, իսկ զինտեխնիկայի ճանապարհային երթևեկության կանոնների պահպանման հսկողությունն իրականացնում է զինվորական ավտոտեսչությունը:
Հավելենք նաև, որ նման կառույցի ստեղծման գաղափարը ՌԴ-ում քննարկվում է դեռևս 2009-ից, Ռազմական ոստիկանության գլխավոր վարչությունը ստեղծվել է 2011-ին: