«Ինսթիգեյթ Ռոբոտիքս» ընկերությունը ՀՀ կառավարության հունվարի 30-ի նիստում «Ալյանս» ազատ տնտեսական գոտում անօդաչու թռչող սարքերի արտադրման թույլտվություն ստացավ։
«Ազատ տնտեսական գոտի գնացինք, քանի որ մեր բիզնես մոդելը հիմնված է արտահանման վրա։ Մենք գործ ունենք ապրանքների ներմուծման և արտահանման հետ, իսկ այսպես մեր գործընթացն ավելի հեշտ կլինի։ Մենք անօդաչուների արտադրություն ենք ունենալու։ Սրա առանձնահատկությունն այն է, որ տալու ենք ծրագրային լուծումներ, որոնք հիմնված են «Ինսթիգեյթի» և «Ինսթիգեյթ մոբայլ»-ի ծրագրային փորձի վրա»,-Ռազմինֆոյի հետ զրույցում նշեց «Ինսթիգեյթ Ռոբոտիքս» ընկերության տնօրեն Ռուբեն Օսիպյանը։
ԱԹՍ-ների առումով ընկերությունը գործելու է ծրագրային լուծումների մշակման ոլորտում։ Այսինքն՝ մշակելու են լուծումներ, որի միջոցով հնարավոր է կառավարել ԱԹՍ-ն։
Ըստ Օսիպյանի՝ սրանք գյուղատնտեսական, կրթական և քաղաքացիական նպատակների իրագործմանն են ուղղված։ Լուծումը հիմնված է L-1 ալգորիթմի վրա, ինչն էլ հնարավորություն է տալիս ապահովել ԱԹՍ-ի կայունությունը։
Արտադրանքն արտահանելու մասին Ռուբեն Օսիպյանը նշում է, որ քանի որ անօդաչուների շուկան կենտրոնացված է ԱՄՆ-ում, որոշ չափով Եվրոպայում և ասիական երկրներում, հիմնականն այնտեղ կարտահանվի, չնայած աշխատելու են նաև ԱՊՀ երկրների հետ, քանի որ այնտեղ էլ կապեր կան։
«Այս պահին մենք կենտրոնացված ենք երկու ուղղությունների վրա՝ գյուղատնտեսական և կրթական։ Կրթականն էլ պայմանավորված է նրանով, որ արտասահմանյան համալսարանները հետաքրքրված են դրանով, իսկ գյուղատնտեսությունն էլ հետաքրքրում է ԱՄՆ-ի շուկային»,- նշում է Ռուբեն Օսիպյանը։
Ընկերությունն ակնկալում է, որ առաջիկա երեք տարվա ընթացքում արտադրատեսակների արտահանումը կապահովի 1,9 միլիոն ԱՄՆ դոլարի վաճառք։
Բացի այդ, ընկերությունը բանակցում է ներդրողների հետ անօդաչուների ավտոմատ կառավարման համակարգի նախագծման համար ներդրումներ ներգավելու վերաբերյալ։ Նախատեսվում է, որ ծրագրի իրականացման շրջանակում օտարերկրյա ներդրումային հիմնադրամներից ներգրավվելու է 300 000-500 000 ԱՄՆ դոլարի ներդրում:
Արտադրության հիմնադրման արդյունքում կստեղծվի 15-25 գիտատար աշխատատեղ, որի միջին ամսական աշխատավարձը կկազմի 500-600 հազար դրամ։
Ռուբեն Օսիպյանը հավաստիացնում է, որ եթե ընկերությունները մեծ տեղ տան Հայաստանի պետական ճարտարագիտական համալսարանի ավտոմատ կառավարման համակարգերի ամբիոնի շրջանավարտներին, ապա փոխգործակցությունն ավելի լավ մակարդակի վրա կհայտնվի։