Ռուսաստանյան Արմատա ծանր թրթուռավոր պլատֆորմի նախագծման աշխատանքներն ավարտվել են, իսկ պլատֆորմի հիմքի վրա պատրաստված Արմատա հիմնական մարտական տանկն արդեն փորձարկումների փուլում է։
Արմատայի հնարավոր արտաքին տեսքը
Ռուսաստանյան Էխո Մոսկվի ռադիոկայանին այս մասին հայտնել է Արմատայի նախագծման աշխատանքներով զբաղվող Ուրալվագոնզավոդ ընկերության տնօրենի՝ հատուկ տեխնիկայի գծով տեղակալ Վյաչեսլավ Խալիտովը։
Խալիտովը նշել է նաև, որ Արմատա տանկից բացի արդեն փորձարկումների փուլում է նաև 152 մմ Կոալիցիա հրետանային համալիրը։ Թե´ տանկը և թե´ հրետանային համալիրը, Խալիտովի խոսքով, նախորդ տարվա սեպտեմբերին Նիժնի Տագիլում անցկացված RAE-2013 ռազմարդյունաբերական ցուցահանդեսի ժամանակ փակ ռեժիմով ներկայացրել են Ռուսաստանի ղեկավարությանը։ Սակայն մինչև հիմա էլ չեն հստակեցվում տեխնիկայի մարտավարատեխնիկական բնութագրերը։
Նախագծողները միայն հայտնում են, որ մասնավորապես Արմատայի նախագծման աշխատանքների ժամանակ օգտագործվել է թե´ ռուսական տանկաշինության փորձը, թե´ նորագույն, հեռանկարային տեխնոլոգիաներ։ Սա թույլ կտա պլատֆորմը օգտագործել երկար ժամանակ ու նրա հիմքի վրա արտադրել բազմաթիվ մարտական մեքենաներ, որոնց թվում՝ հակաօդային պաշտպանության, հրթիռահրետանային, ինժեներական և այլ տեխնիկա։
Ըստ նախագծողների՝ Արմատան ու Կոալիցիան հանրությանը կներկայացվեն 2015-ին անցկացվելիք ռազմարդյունաբերական ցուցահանդեսի ժամանակ, իսկ Արմատայի հիմքի վրա ստեղծված տեխնիկայի որոշ տեսակներ նախատեսված է ներկայացնել նաև Հաղթանակի օրվա կապակցությամբ 2015-ի մայիսի 9-ին կայանալիք զորահանդեսի ժամանակ։
Խալիտովի խոսքով՝ Արմատայի ստեղծումը չի նշանակում, որ Ռուսաստանը հրաժարվում է իր մյուս տանկերից։ Տանկերի փոխարինումը կկատարվի աստիճանաբար, քանի որ սպառազինության մեջ առկա Տ-72 ու Տ-90 տանկերը դեռ շահագործման ժամկետ ունեն, իսկ Արմատային միանգամից անցնելը կարող է լրացուցիչ խնդիրներ առաջացնել։ Ռուսական կողմը նախատեսում է, որ տեխնիկայի ամբողջական փոխարինումը կկատարվի մոտ 20 տարվա ընթացքում։