Թուրքիայի ԶՈւ ռազմաօդային ուժերի մեծ թվով օդաչուներ հերթական անգամ ԶՈւ շարքերից հեռանալու դիմում են ներկայացրել։ Տեղեկությունը հաստատել է Թուրքիայի պաշտպանության նախարար Իսմեթ Յըլմազը։
F-16. Թուրքիայի ԶՈւ
Ըստ թուրք նախարարի՝ 2014 թվականի առաջին շաբաթներին թուրքական օդուժից հեռացել է 47 օդաչու։ Նախարարը չի մանրամասնել, թե ինչն է պատճառ դարձել օդաչուների զանգվածաբար հեռանալուն։
Յըլմազը, ով պատասխանել է խորհրդարանական հարցմանը, հավելել է, որ վերջին երկու տարիներին Թուրքիայի ռազմաօդային ուժերի շարքերն ընդհանուր առմամբ լքել է շուրջ 300 օդաչու։ Այս ամենը խնդիրներ է առաջացրել թուրքական զինուժի համար, ով ներկայում F-16 և F-4 մարտական ինքնաթիռների օդաչուների պակաս է զգում։
Նշենք, որ 2013 թվականին ևս օդաչուները զանգվածաբար դիմել են ԶՈւ շարքից հեռանալու համար, ինչը կապում են թուրքական իշխանությունների՝ զինված ուժերի ղեկավարության դեմ դատական հետապնդումների փաստով։ Թուրքիայի իշխող իսլամամետ «Արդարություն և զարգացում» կուսակցությունն իր իշխանության ավելի քան 10 տարիների ընթացքում անում է թուրք գեներալներին ներքին քաղաքականությունից հեռացնելու քայլեր, ինչը մեծամասամբ հաջողվել է վարչապետ Էրդողանին ու նրա կողմնակիցներին։
Այս ամենին հասնելու համար Թուրքիայում վերջին տարիներին հարյուրավոր զինվորականներ են ձերբակալվել, ովքեր մեղադրվել են պետական հեղաշրջում կազմակերպելու համար։ Բացի այդ, ԱԶԿ-ն որոշակի օրենսդրական փոփոխություններ է արել, որով նույնպես փոքրացրել է զինվորականների դերը երկրի քաղաքականությունում։