Իրանի պաշտպանության նախարարության և խորհրդարանի համատեղ պատվիրակությունը պատրաստվում է մեկնել Մոսկվա՝ քննարկելու ՌԴ-ից գնած և այդպես էլ չստացած Ս-300 հակաօդային պաշտպանության համակարգերը փոխարինելու հարցը։
Ս-300ՊՄՈւ-1-ի բաղադրիչ
Իրանի խորհրդարանի պաշտպանական հարցերով հանձնաժողովի ղեկավար Էսմաիլ Քոսարին նշել է, որ իրենք հանդիպել են ազգային անվտանգության և արտաքին քաղաքականության քարտուղար Ալահեդդին Բորուջերդիին և Ռուսաստանում Իրանի դեսպան Մեհդի Սանաին։
Հանդիպման ժամանակ քննարկվել է Իրանի համար նախատեսված Ս-300ՊՄՈւ-1 զենիթահրթային համակարգերն այլ տարբերակներով փոխարինելու հարցը, ինչի համար էլ պատվիրակություն է մեկնելու Ռուսաստան, տեղեկացնում է իրանյան «Ֆարս» լրատվական գործակալությունը։
Հիշեցնենք, որ 2007 թվականին Իրանն ու Ռուսաստանը պայմանագիր էին կնքել Ս-300ՊՄՈւ1 համակարգերի ձեռք բերման վերաբերյալ։ Իրանական աղբյուրների տեղեկություններով՝ Թեհրանը պատվիրել էր առնվազն 5 միավոր նման համակարգ։
Սակայն ՀՕՊ համակարգերը մինչ օրս այդպես էլ չեն տրամադրվել Իրանին, ինչն արդեն բազում տարաձայնությունների պատճառ է դարձել Մոսկվայի և Թեհրանի միջև։
ՌԴ-ն Ս-300ՊՄՈւ1-ի ուշացումը պատճառաբանում է ՄԱԿ ԱԽ սահմանած բանաձևերով, որոնք արգելում են իրանական կողմին հանձնել մի շարք զինատեսակներ, այդ թվում, ըստ ռուսական կողմի, նաև Ս-300 ՀՕՊ համակարգերը։
2010 թվականին ՌԴ նախագահ Դմիտրի Մեդվեդևը հրամանագիր էր ստորագրել, որով սահմանափակվում էր Իրանի հետ ռազմական համագործակցության վրա՝ միևնույն ժամանակ վավերացնելով ՄԱԿ ԱԽ բանաձևերն ու վերջնականապես արգելելով Ս-300-երի վաճառքը։
Իրանը 2011 թվականին դիմել է Ժնևի միջազգային արբիտրաժային դատարան ընդդեմ «Ռոսօբորոնէքսպորտի»՝ պայմանագիրը չկատարելու համար։ Իրանական կողմը ռուսներից 4 մլրդ ամերիկյան դոլար է պահանջում։
Վերջին շրջանում մամուլում հայտնվում են տեղեկություններ, թե ռուսական կողմը պատրաստվում է Ս-300-ի փոխարեն Իրանին առաջարկել այլ ՀՕՊ համակարգեր, սակայն Թեհրանը հրաժարվում է և պահանջում պայմանագրով սահմանված զինատեսակը։
Անցած ամռանն էլ համակարգերն արտադրող «Ալմազ Անթեյ» կոնցերնի նախագահ Վլադիսլավ Մենշիկովը հայտարարեց, թե Իրանի համար նախատեսված համակարգերն այլևս գոյություն չունեն։