Ռուսաստանի Մուրմանսկի շրջանի դատախազության հավաքագրած տվյալները դատարանը բավարար է համարել Ադրբեջանի քաղաքացի Ուլվի Ջաբարովին թշնամանքի և ծայրահեղական գաղափարների տարածման հոդվածներով մեղավոր ճանաչելու համար։
Համաձայն հետաքննության տվյալների՝ Ջաբարովը, 2011-ի հոկտեմբերի 31-ից մինչև 2012-ի հունվարի 17-ն ինտերնետ ակումբների համակարգիչները կիրառելով, սոցցանցերում «ջիհադի» կոչեր է տարածել՝ տեսանյութերի տեսքով։ Նրան ձերբակալել են 2013-ի հունիսի 29-ին։
Ձերբակալությունից հետո իրավապահ մարմինների աշխատակիցները խուզարկություն են կատարել կասկածյալի բնակարանում՝ հայտնաբերելով ծայրահեղական իսլամիստական բովանդակության գրականություն։
Հավելենք, որ Ջաբարովին դատապարտել են 1 տարի 9 ամիս ուղղիչ աշխատանքների, որոնց վարձատրության 10 տոկոսը պետական պահումների է հատկացվելու։
Նկատենք նաև, որ վերջին շրջանում մեծ թիվ են կազմում ադրբեջանական մամուլում տարածված լուրերը Սիրիայում սպանված ադրբեջանցի զինյալների մասին, որոնց մեծ մասը ևս ծայրահեղական իսլամիստական գաղափարների հետևորդներ են։