ՄԱԿ-ի գլխավոր քարտուղար Բան Կի-Մունը մեղադրել է Հարավային Սուդանի զինված ուժերի զինծառայողներին և նրանց դեմ մարտնչող զինյալներին ՄԱԿ-ի մարդասիրական օգնության գողության համար։
Հարավային Սուդանի ԶՈւ զինծառայողներ
Այս մասին հունվարի 15-ին հաղորդել է «Ռոյթերս» լրատվական գործակալությունը՝ հղում կատարելով ՄԱԿ-ի մամուլի ծառայության հաղորդագրությանը։
Բան Կի-Մունը շեշտել է, որ իրենց կողմից Հարավային Սուդանի խաղաղ բնակիչների համար նախատեսված սննդի պաշարները, առաջին անհրաժեշտության պարագաները և ուղարկված մյուս բոլոր իրերը գողացվում են՝ դրանք փոխադրող ավտոշարասյուների վրա պարբերաբար իրականացվող հարձակումների հետևանքով։ Նա նշել է, որ բացի զինյալներից, թալանի իրականացումից անմասն չեն կառավարական ուժերը ևս։
ՄԱԿ-ի գլխավոր քարտուղարն ընդգծել է, որ իրենց մտահոգությունների շարքում է նաև Հարավային Սուդանում խաղաղ բնակիչների շրջանում զոհերի մեծ քանակը։ ՄԱԿ-ի տվյալներով՝ միայն հունվարի 14-ին ավելի քան 200 խաղաղ բնակիչ խեղդվել է Նեղոսում՝ փորձելով դուրս գալ Մալաքալում մարտական գործողությունների գոտուց։ Կազմակերպության նախնական տեղեկությունների համաձայն՝ հակամարտության կամ քաղաքացիական պատերազմի սկզբից ի վեր զոհերի ընդհանուր թիվն անցնում է հազարից։ Տարբեր գնահատականներով՝ իրականում զոհերի թիվը մոտ 10 հազար է։
Հիշեցնենք, որ իրավիճակը Հարավային Սուդանում լարված բնույթ է ստացել 2013-ի դեկտեմբերի 16-ից, երբ երկրի նախկին փոխնախագահ Ռիեկա Մաշառան իրականացրեց հեղաշրջման անհաջող փորձ։ Մայրաքաղաքում անհաջողության մատնվելուց հետո ապստամբները նահանջել են երկրի հյուսիսային շրջաններ։ Կառավարական ուժերն առայժմ հետզհետե վերահսկողություն են սահմանում ապստամբական կենտրոնների նկատմամբ։