Իտալիայի 2014 թվականի պետական բյուջեով շուրջ 8 մլրդ ամերիկյան դոլար է հատկացվել ռազմածովային ուժերի համար նոր ռազմանավեր ձեռք բերելուն: Այս մասին Defense News ռազմական լրատվակայքի հետ զրույցում հայտնել է Իտալիայի ռազմածովային ուժերի հրամանատար Ջուզեպե Դե Ջորջին:
PAM: Լուսանկարը` Իտալիայի ՌԾՈւ
Իտալական նավատորմի հրամանատարի խոսքերով` իրենք բավարարված են խորհրդարանի որոշումից և կարող են մի փոքր շունչ քաշել, քանի որ նոր ռազմանավերի կարիքը շատ էր զգացվում:
Թեև ծրագրով հատկացվել է 7.8 մլրդ ամերիկյան դոլար, սակայն առանց տոկոսների, այսպես ասած, «մաքուր գումարը» կազմելու է 6.1 մլրդ եվրո:
Բյուջեով հատկացված գումարով իտալացի զինվորականները գնելու են 10 նավ, որոնցից 8-ը պետք է լինեն բազմանպատակային նավեր, 1-ը` ամֆիբիա նավ, ևս մեկը`թիկունքային ապահովման նավ: Սպասվում է, որ նոր ռազմանավերը կառուցվելու են առաջիկա 10 տարիների ընթացքում:
Իտալացիները ձեռք են բերելու նոր Pattugliatori d’Altura Multiruolo (PAM) բազմանպատակային նավեր, որոնցով պետք է փոխարինվեն հնացած Soldati ֆրեգատները, Minverva և Cassiopea պարեկային նավերը: Նավի նախագիծը մշակում է Իտալիայի ռազմածովային ուժերը, իսկ այն կառուցելու է Fincantieri ընկերությունը: PAM նախագծի մեկ նավի մոտավոր արժեքն է 470 մլն ամերիկյան դոլար: