Ռուսաստանը մտադիր է ռազմական նավաշինության ոլորտում փորձարկել մոդուլային նավի տարբերակը: Վերջինս ենթադրում է կառուցվող նավի այնպիսի նախագծում, որը թույլ կտա սեղմ ժամկետներում վերափոխել նավի առաջնային նշանակությունը՝ այն, օրինակ, պարեկայինից դարձնելով հրթիռային:
Ռազմական նավերի այս նախագծով կառուցման արդյունավետությունը կգնահատվի ՌԴ ռազմածովային ուժերի, ռազմածովային ակադեմիայի և նավաշինական միացյալ ձեռնարկության համատեղ աշխատանքային խմբի կողմից: Այս մասին Ռիա Նովոստի լրատվական գործակալությանը հայտնել են ՌԴ պաշտպանության նախարարությունից։
ՌԴ ՌԾՈւ 20380 նախագծի Կորվետ դասի նավ
Ավելի վաղ ՌԴ ռազմածովային ուժերի հրամանատար, ծովակալ Վիկտոր Չիրկովը հայտարարել էր, որ ռազմանավերի մոդուլային եղանակով կառուցումն ի թիվս այլ առավելությունների հնարավորություն կտա նաև վերջնական արտադրանքը ստանալ ավելի մատչելի գնով: Ակնկալվում է, որ մոդուլային նավի առաջին օրինակը ՌԴ ՌԾՈւ-ին կփոխանցվի արդեն 2018-2020 թվականներին:
Ադմիրալ Չիրկովը հավելել է նաև, որ մոդուլային մեկ նավը կկարողանա կատարել այնպիսի խնդիրներ, որոնց համար այժմ կիրառվում է մի քանի նավ: Դրա շնորհիվ հետագայում հնարավոր է ՌԴ ՌԾՈւ-ում կրճատվեն հերթապահություն կրող նավերի տեսակները: Նշենք, որ մոդուլային առաջին նախագիծը կառուցվելու է փոքր ջրատարողության պարեկային նշանակության կորվետ դասի նավի վրա: