Հունվարի 6-ին Մալթայի դրոշի ներքո նավարկող նավթային տանկերը փորձել է առանց նախապես համաձայնեցնելու մուտք գործել լիբիական Աս Սիդրա նավահանգիստ, ուստի Լիբիայի ռազմածովային ուժերը հարկադրված են եղել կրակել տանկերի ուղղությամբ։
«Բաքու» տանկերը
Համաձայն Լիբիայի ՆԳՆ ներկայացուցչի՝ տանկերը փորձել է մոտենալ զինյալների վերահսկողության ներքո ափամերձ տարածքներին՝ նավթ բեռնելու նպատակով։ Լիբիայի ռազմածովային ուժերի մամուլի խոսնակ Այուբ Քասսեմի խոսքերով՝ լիբիական նավերը հետևել են «Բաքու» տանկերին այնքան ժամանակ, մինչև վերջինս սկսել է նավթի բեռնման գործընթացը, ապա զգուշացրել են դադարեցնել և հեռանալ Միսուրաթա նավահանգիստ, սակայն տանկերի անձնակազմը հրաժարվել է կատարել լիբիացիների պահանջը։ Խոսնակը հայտարարել է, որ իրենց կրակից հետո տանկերը հեռացել է Լիբիայի ջրային տարածքներից դեպի Մալթա։
Հիշեցնենք, որ Լիբիայի նավթային միավորումը նախազգուշացրել էր՝ առանց Լիբիայի կառավարության թույլտվությամբ նավերի ու նավթային տանկերների մուտքը զինյալների հսկողության տարածքներ անհապաղ կասեցվելու է կառավարական ուժերի կողմից։
Հետաքրքիր է այն հանգամանքը, որ «Ռոյթերս» լրատվական գործակալության հաղորդմամբ՝ տանկերը պատկանում է օֆշորային Royal Asset Management ընկերությանը։ Ադրբեջանի «Կասպյան ծովային նավատորմ» ՓԲԸ-ն իր հերթին շտապել է հայտարարել, որ իրենք Կասպից ծովի ջրային տարածքներիից դուրս որևէ տանկեր կամ նավ չունեն։
Հունվարի 8-ին արդեն հայտնի է դարձել, որ տանկերն իրականում պատկանում է ադրբեջանցի միլիարդատեր Մուբարիզ Մանսիմովի Palmali ընկերությանը։ Ընդ որում, ընկերությունը պաշտոնական հաղորդագրություն է տարածել, որտեղ քննադատում է Լիբիայի ռազմածովային ուժերի քայլը։ Բացի այդ, ըստ հաղորդագրության՝ «Բաքու» տանկերը նավթի ապօրինի բեռնում չի իրականացրել, չի փորձել խարսխվել Աս Սիդրա նավահանգստում, ընդամենը հրաժարվել է կատարել լիբիացի զինվորականների պահանջը Միսուրաթա նահահանգստում կանգ առնելու։ Palmali-ն միևնույն ժամանակ մեղադրել է լիբիական ռազմական նավերին միջազգային իրավունքի խախտման՝ կրակ բացելու և տանկերին հետապնդելու համար։ Լիբիական կողմը դեռևս չի արձագանքել։
Հավելենք նաև, որ 2013-ի օգոստոսի վերջին համանման միջադեպ է գրանցվել կրկին ադրբեջանական տանկերի մասնակցությամբ. ՌԴ անվտանգության դաշնային ծառայությունը ձերբակալել էր ադրբեջանական դրոշի ներքո նավարկող «Նավթալան» տանկերի անձնակազմին, որն ապօրինի կերպով նավթ էր բեռնում Մախաչկալայում։