Ադրբեջանի պաշտպանության նախարար, գեներալ-գնդապետ Զաքիր Հասանովը մեկնել է Նախիջևան՝ ստուգելու «նորաստեղծ» առանձին համազորային բանակի պատրաստությունը նոր ուսումնական շրջանին ընդառաջ:
Ադրբեջանի պաշտպանության նախարար, գեներալ-գնդապետ Զաքիր Հասանով
Ինչպես հաղորդում է Ադրբեջանի ՊՆ-ն, նախարարի գլխավորած աշխատանքային խումբն այցի ընթացքում ստուգելու է զորամասերի նյութատեխնիկական և սպառազինության ապահովման աստիճանը, ինչպես նաև ծանոթանալու է անձնակազմի սոցիալ-կենցաղային պայմաններին:
Հիշեցնենք, որ 2013 թվականի դեկտեմբերի 20-ին հայտնի դարձավ, որ Ադրբեջանի զինված ուժերի 5-րդ բանակային կորպուսի հիման վրա Նախիջևանում նախատեսվում է ստեղծել առանձին համազորային բանակ, որի հրամանատար պետք է նշանակվեր Նախիջևանի բանակային զորամիավորման հրամանատար, գեներալ-լեյտենանտ Քերիմ Մուսթաֆաևը:
Այժմ արդեն Ադրբեջանի ՊՆ մամուլի հաղորդագրությունում նախիջևանյան բանակային կորպուսն անվանվում է «առանձին համազորային բանակ»: