Հնդկաստանի պաշտպանության նախարարությունը, ստորագրած պայմանագրի համաձայն, ԱՄՆ-ից ձեռք կբերի 6 միավոր C-130J Super Hercules (Սուպեր Հերկուլես) բեռնատար ինքնաթիռներ։
Ինքնաթիռները կտրամադրվեն Հնդկաստանի ԶՈւ հատուկ ուժերի ստորաբաժանումներին։ Նախատեսված է, որ պայմանագիրը կիրագործվի առաջիկա 3 տարիների ընթացքում։
Հնդկաստանի ԶՈւ-ի C-130J-30 ինքնաթիռը վայրէջք է կատարում աշխարհի ամենաբարձր Դաուլաթ Բեգ Օլդի ռազմական օդանավակայան
Ներկա պայմանագրի արժեքը շուրջ 645 մլն ԱՄՆ դոլար է։ Պայմանագիրը կնքվել է Հնդկաստանի ՊՆ-ի՝ դեռևս սեպտեմբերին հաստատված ծրագրի շրջանակներում, որի ընդհանուր արժեքը շուրջ 2,37 մլրդ ԱՄՆ դոլար է։
Ներկա պահին Հնդկաստանի ԶՈւ սպառազինությունում կա 6 միավոր C-130J-30 բեռնատար ինքնաթիռ, որոնք C-130J-ների արդիականացումն են։ Հնդկաստանը դրանք ձեռք է բերել 2008-ի մարտին կնքած պայմանագրով։ Պայմանագիրը, որի արժեքը շուրջ 962 մլն ԱՄՆ դոլար է եղել, նախատեսել է նաև օժանդակ սարքավորումների, պահեստամասերի, երաշխիքային սպասարկման տրամադրումն ու անձնակազմի ուսուցումը։
Super Hercules ինքնաթիռը նախատեսված է տարբեր բեռներ ու անձնակազմ տեղափոխելու համար։ Անձնակազմը 3 հոգի է, կարող է տեղափոխել մինչև 92 զինծառայող։ Ինքնաթիռի զանգվածը շուրջ 34 տոննա է, իսկ առավելագույն թռիչքային զանգվածը՝ շուրջ 80 տոննա։ Ինքնաթիռն ունի 4 շարժիչ՝ ամեն մեկը 4637 ձիաուժ հզորությամբ ու կարողանում է զարգացնել մինչև 671 կմ/ժ արագություն: Առավելագույն թռիչքային հեռավորությունը 5250 կմ է։