Ադրբեջանի Սումգայիթ քաղաքում տեղակայված ներքին զորքերի զորամասերից մեկում մահացել է 2 ամիս առաջ զորակոչված զինծառայող Միրմամեդով Ռահման Տաջիկ օղլուն։ Ադրբեջանական ԱՊԱ լրատվական գործակալությանը ներքին զորքերի մամուլի ծառայությունից հաստատել են զինծառայողի մահվան փաստը։
Ադրբեջանի ներքին զորքերի զինծառայողներ
Ըստ նախնական տեղեկության` զինծառայողը վայր է ընկել զորամասի տարածքում մաքրման աշխատանքներ կատարելիս։ Մահվան պատճառի պարզման նպատակով նշանակվել է փորձաքննություն։ Հաղորդվում է նաև, որ 18-ամյա Մամեդովը զինվորական ծառայության է զորակոչվել այս տարվա հոկտեմբերին՝ Շամխորի շրջանից։
Նշենք, որ վերջին երկու օրերի ընթացքում սա Ադրբեջանի պաշտպանական համակարգերում մահվան ելքով արդեն երկրորդ միջադեպն է։ Դեկտեմբերի 28-ին Բաքու-Շամախ ավտոճանապարհի 59-րդ կիլոմետրին խոշոր ՃՏՊ-ի հետևանքով մահացել էր ԶՈւ Բաքվի զորամասերից մեկի 28-ամյա զինծառայող Սամանդար Խալիլովը։
Հավելենք նաև, որ այս կորուստը Ադրբեջանի պաշտպանական համակարգերի համար 86-րդն է 2013 թվականի ընթացքում։