Եմենում 17 հոգի սպանվել է անօդաչու թռչող սարքից արձակված կրակի հետևանքով։ ԱԹՍ-ն ենթադրաբար պատկանում էր ԱՄՆ-ին, մասնավորապես՝ Կենտրոնական հետախուզական վարչությանը (ԿՀՎ)։
Ինչպես հաղորդում է AFP լրատվական գործակալությունը, միջադեպը գրանցվել է դեկտեմբերի 12-ին Ռադաա քաղաքի մերձակայքում։ Հարձակման զոհ են դարձել հիմնականում խաղաղ բնակիչները, քանի որ ԱԹՍ-ն հարձակում է գործել հարսանեկան շքերթի ուղղությամբ։ ԱԹՍ-ի օդային հարվածների պատճառով պայթել է հարսանեկան ավտոմեքենան, որի մեջ նվազագույնը 10 հոգի էր։
Համաձայն Եմենի անվտանգության ուժերի ներկայացուցչի՝ սպանվածների շարքում են նաև «ալ Կաիդայի» անդամներ, որոնց դեմ էլ ուղղված էր հարձակումը։ AFP-ին հայտնի է դարձել նրանցից երկուսի անունը՝ Սալեհ ալ-Թաիս ու Աբդուլլահ ալ Թաիս։ Եմենի իշխանությունները վաղուց էին հետախուզում նրանց՝ ահաբեկչություն իրականացնելու մեղադրանքով։
Հիշեցնենք, որ դեռևս 2013-ի օգոստոսի 7-ին ամերիկյան ԱԹՍ-ները Եմենի Շաբվա շրջանում ոչնչացրել էին նվազագույնը 14 զինյալի։
Նկատենք, որ ԱԹՍ-ի կիրառմամբ հատուկ գործողությունները Եմենում վերահսկում է ԿՀՎ-ն։ Այս կերպ ամերիկյան իշխանություններն աջակցում են Եմենի կառավարությանը «ալ Կաիդայի» դեմ պայքարում։ Համանման գործողություններ իրականացվում են Պակիստանում ու Սոմալիում։ Ընդ որում, ԱՄՆ-ն բազմիցս քննադատությունների է ենթարկվում այս քայլերի համար, քանի որ ԱԹՍ-ի հարձակման զոհ են դառնում հիմնականում խաղաղ բնակիչներ։ Բացի այդ, իրավապաշտպանները բազմիցս շեշտել են՝ ԱԹՍ-ի միջոցով Եմենի իշխանություններն ու ԱՄՆ-ն ոչնչացնում են կասկածյալ-ահաբեկիչների, որոնց հանցանքն ապացուցված չէ, և նրանց կարելի է ձերբակալել ողջ վիճակում։
Վաշինգթոնն էլ ի պատասխան քննադատության՝ հավաստիացնում է, որ հնարավորինս հստակորեն են ստուգում հետախուզության տվյալներն ու թիրախներ ընտրում ԱԹՍ-ների համար, որպեսզի խուսափեն խաղաղ բնակչությանը վնասելուց։
Pingback: «Ալ Կաիդայի» զինյալները հարձակվել են Եմենի ԶՈւ հենակետերից մեկի վրա. կան զոհեր | Ռազմ.info