Հնդկաստանի պաշտպանության նախարարությունը որոշում է կայացրել շահագործումից դուրս բերված Vikrant (Վիկրանտ) ավիակիրն աճուրդ հանելու վերաբերյալ։
Ինչպես հաղորդում է հնդկական Zeenews կայքը, նման որուշում է կայացվել, երբ ավիակրի հետագա շահագործումը ճանաչվել է աննպատակահարմար։
Հնդկաստանի ԶՈւ արևմտյան ծովային հրամանատարության ղեկավար ծովակալ Շեքհար Սինհան նշել է, որ ռազմածովային ուժերը պատրաստ են աջակցել գնորդին՝ ավիակիրը թանգարանի վերափոխելու գործում։ Աճուրդի մասնակիցների հայտերի ընդունման վերջնաժամկետ է սահմանվել սույն թվականի դեկտեմբերի 14-ը։
Նշենք, որ ավիակրի կառուցումը սկսվել է դեռ 1943 թվականին և ի սկզբանե նախատեսված է եղել Միացյալ Թագավորության նավատորմի համար։ Այն կրել է Hercules (Հերկուլես) անվանումը։
1957 թվականին ավիակիրն անավարտ վիճակում վաճառվել է Հնդկաստանին և միայն 1961-ին շահագործման հանձնվել հնդկական նավատորմին։
Վիկրանտն ակտիվորեն ներգրավված է եղել ռազմական գործողություններին՝ 1965 և 1971 թվականների Պակիստանի և Հնդկաստանի միջև մղվող պատերազմների ժամանակ։