Ամերիկյան Textron ընկերությունը հայտարարել է նոր հարվածային Scorpion ինքնաթիռների՝ թռիչքուղու վրա վերգետնյա փորձարկումների մասին, որոնց հաջորդելու են առաջիկայում կայանալիք առաջին թռիչքն ու թռիչքային փորձարկումները։
Ըստ Textron ընկերության ներկայացուցիչների՝ առաջին թռիչքը հավանաբար կկայանա դեկտեմբերի 5-ին ԱՄՆ ՌՕՈւ ՄըքՔոնել ավիաբազայում։
Նշենք, որ Scorpion-ի կմախքի կենտրոնական հատվածում տեղադրված է մեկուսախուց տարբեր տեսակի, այդ թվում հետախուզական սարքավորումների համար։ Այն ունի 2 շարժիչ, թռիչքային զանգվածը կազմում է 9638 կգ։ Ինքնաթիռը կարող է բարձրանալ մինչև 13 716 մ, առավելագույն արագությունը՝ 900 կմ/ժ, թևի բացվածքը՝ 14.4 մ, ունի պիլոններ կառավարվող ու չկառավարվող հրթիռների համար։
Արտադրական ծախսերը նվազագույնի են հասցվել Cessna ընկերության ինքնաթիռների արտադրության համար նախատեսված սարքավորումների կիրառման շնորհիվ։
Scorpion նախագիծը նախատեսված է հիմնականում մարտի դաշտում ցամաքային զորքերին աջակցելու համար։ Այն հնարավոր է օգտագործել որպես հետախուզական ինքնաթիռ։
Նկատենք, որ Textron-ը չի հիշատակում ինքնաթիռի արժեքը, սակայն հայտնի է՝ այն բավականին ցածր է լինելու մյուս ինքնաթիռներից, որպեսզի նյութական լայն հնարավորություններ չունեցող երկրներում կարողանան դրանցով փոխարինել հնացած խորհրդային ու ամերիկյան կործանիչները։
Scorpion նախագծի իրականացումը մեկնարկել է դեռևս 2012-ին։ Ներկա դրությամբ ինքնաթիռի նախատիպի փորձարկումներն են ընթանում, ստուգվում են շարժիչների ու հանգույցների աշխատանքները։