ԱՄՆ պետքարտուղար Ջոն Քերին նոյեմբերի 20-ին հաստատել է ԱՄՆ-ի ու Աֆղանստանի երկկողմ համաձայնագրի առկայության փաստը, որը թույլ է տալու ԱՄՆ ԶՈւ զինծառայողներին Աֆղանստանում մնալ անգամ խաղաղապահների դուրսբերումից հետո։
Ինչպես հաղորդում է ամերիկյան The New York Times պարբերականը, համաձայնագիրը դեռևս պետք է հաստատվի աֆղանական Լոյյա Ջիրղա ցեղային ավագանու կողմից։
Քերիի խոսքերով՝ նոր համաձայնագիրը ենթադրում է Աֆղանստանում ԱՄՆ զինծառայողների գործունեության երկարաձգումը մինչև 2024-ը։ Բացի այդ, փաստաթղթի կետերում մեկում նշված է միլիարդավոր դոլարների հասնող միջազգային օգնություն տրամադրելու մասին։
Նշենք, որ աֆղանական կողմը հայտարարել էր համաձայնագրի վերաբերյալ բանակցությունների հաջող ավարտի մասին դեռևս նոյեմբերի 19-ին, սակայն ԱՄՆ-ն պնդում էր՝ չհստակեցված հարցեր կան։
Աֆղանստանի նախագահ Համիդ Քարզայի մամուլի քարտուղարը հայտարարել է՝ նոր համաձայնագրի հաստատման դեպքում ԱՄՆ զինծառայողները կազատվեն տեղական օրենքի առջև պատասխանատվություն կրելուց և նույնիսկ իրավունք կունենան արտակարգ իրավիճակներում մուտք գործել աֆղանցիների մասնավոր սեփականության տարածք։
Այնուհանդերձ, մամուլի քարտուղարի խոսքերով՝ Աֆղանստանը սպասում է, որ ԱՄՆ-ն, մասնավորապես նախագահ Բարաք Օբաման, ներողություն կհայցի Աֆղանստանում 12-ամյա գործունեության ընթացքում թույլ տված սխալների համար՝ խոստանալով չկրկնել դրանք, սակայն Քերին հայտարարել է՝ ոչ մի ներողություն էլ չի հնչելու։
Հավելենք, որ մայրաքաղաք Քաբուլում արդեն մեկնարկել է ցեղային ավագանու ժողովը, որն էլ որոշելու է համաձայնագրի հետագա ճակատագիրը։ Ժողովը տևելու է 4 օր, մասնակցելու են նաև նախագահն ու կառավարության անդամները։
Ներկա դրությամբ Աֆղանստանում ծառայություն են անցնում շուրջ 60 հազար ԱՄՆ զինծառայողներ։ Նրանց գերակշիռ մասը պետք է լքի Աֆղանստանը մինչև 2014-ի ավարտը։ Նախնական տվյալներով՝ ակնկալվում է Աֆղանստանում թողնել 10 հազար զինծառայող։
Pingback: ԱՄՆ-ն շուրջ 10 հազար զինծառայող է թողնելու Աֆղանստանում | Ռազմ.info