Չինաստանի զինված ուժերում ներքին ստուգումների հետևանքով հայտնաբերվել է, որ բարձրաստիճան զինծառայողներն ապօրինի կերպով օգտագործել են շուրջ 8100 բնակարան ու 25 հազար ավտոմեքենա։ Ամենայն հավանականությամբ, նրանց չեն ձերբակալի։
Չինաստանի Ժողովրդական-ազատագրական բանակի հրամանատարությունը ժողով է գումարել, որտեղ քննարկվել են բանակում թերությունները, այդ թվում՝ բնակարանների ու ավտոմեքենաների ապօրինի կիրառումը։ Դրանք զբաղեցնող զինվորականներին հրահանգվել է անմիջապես ազատել բնակարաններն ու վերադարձնել ավտոմեքենաները, որպեսզի չենթարկվեն վարչական տուգանքների։
Բացի այդ, պատասխանատու անձանց հանձնարարվել է ավելի հստակ սահմանել՝ երբ ու ինչ պայմաններում է թույլատրվում օգտագործել ծառայողական ավտոմեքենաները։
Հիշեցնենք, որ դեռևս 2012-ի դեկտեմբերին Չինաստանի կոմունիստական կուսակցության ռազմական խորհուրդը կոչ է արել զինվորականներին զուսպ կենցաղ վարել, հեռու մնալ չափից դուրս շքեղ կյանքից, չհաճախել պաթոսային երեկույթների։
Բացի այդ, 2013-ի ապրիլին օրենք է ընդունվել, ըստ որի՝ փոխգնդապետից բարձր կոչում ունեցողները պարտավորվում են 15 օր ծառայել որպես շարքայիններ։
Նկատենք, որ Չինաստանում ԶՈւ և մյուս գերատեսչություններում կոռուպցիայի դեմ համակարգված պայքար է սկսել կոմունիստական կուսակցության ներկայիս ղեկավարությունը՝ Սի Ցզինպինի գլխավորությամբ։ Այս պայքարի շրջանակներում կաշառակերության համար մահապատժի են դատապարտվել մի շարք բարձրաստիճան պաշտոնյաներ։