Պակիստանի զինված ուժերի Կոբրա AH-1F (AH-1F Cobra) ուղղաթիռը վթարվել է երկրի հյուսիսարևելյան Գունջարվալ քաղաքից ոչ հեռու։ Նախնական վարկածով՝ ուղղաթիռի վայր ընկնելու պատճառ է եղել տեխնիկական անսարքությունը։
Ուղղաթիռը վայր է ընկել հոկտեմբերի 28-ին Ռահվալի բնակավայրի մոտակայքում։ Վթարի հետևանքով ուղղաթիռի երկու օդաչուները ծանր վնասվածքներով տեղափոխվել են հիդանդանոց, տեղեկացնում է Defense News ռազմական լրատվակայքը։
Ներկայում հետաքննություն է ընթանում՝ պարզելու վթարի պատճառները։
Լուսանկարից երևում է, որ ուղղաթիռը մակերևույթին բախվելուց հետո երկու մասի է բաժանվել։
Նշենք, որ ըստ ոչ պաշտոնական տվյալների՝ պակիստանյան օդուժն ունի շուրջ 40 միավոր AH-1F Cobra ուղղաթիռ։
Հավելենք, որ Պակիստանը փորձում է թարմացնել հարվածային ուղղաթիռների պարկը։
Պակիստանյան կողմին ուղղաթիռներ մատակարարելու համար պայքարում են Թուրքիան և Միացյալ Նահանգները։ Թուրքերն առաջարկում են իտալական Agusta A129 Mangusta ուղղաթիռների հիմքի վրա ստեղծված և դեռ փորձարկումների փուլում գտնվող T129 Atak ուղղաթիռը, իսկ ԱՄՆ-ն՝ AH-1Z Viper հարվածային ուղղաթիռները։