Թուրքիայի զինված ուժերի ցամաքային զորքերի ստորաբաժանումները մասնակցում են Լատվիայում և Լեհաստանում ՆԱՏՕ-ի հովանու տակ ընթացող միջազգային զորավարժությանը։
Ինչպես տեղեկացնում է Թուրքիայի ԶՈւ գլխավոր շտաբի կայքը, Steadfast Jazz (Սթիդֆասթ Ջազ) զորավարժությունը մեկնարկել է հոկտեմբերի 28-ին և շարունակվելու է մինչ նոյեմբերի 9-ը։ Թե քանի հոգի է Թուրքիայից մասնակցում զորավարժությանը, պաշտոնական աղբյուրը չի նշում։
ՆԱՏՕ-ի պաշտոնական կայքը տեղեկացնում է, որ սա թվով 18-րդ զորավարժությունն է Steadfast Jazz շարքից, որն արդեն անցկացվել է 14 պետության տարածքում։
Լատվիայում և Լեհաստանում ընթացող վարժանքներին մասնակցում է մի քանի հազար զինծառայող, որոնք ներկայացնում են հյուսիսատլանտյան դաշինքի անդամ պետությունների զինված ուժերը։
Հերթական զորավարժությունը նպատակ ունի զարգացնել համագործակցությունը ՆԱՏՕ-ի անդամ երկրների ստորաբաժանումների միջև։
Թուրքիան ՆԱՏՕ-ի անդամ է 1952 թվականից։