Պակիստանի հատուկ ծառայությունները բացահայտել են Ադրբեջանի հետ միջազգային հեռախոսակապով գաղտնի բանակցություններ, որոնք ազգային անվտանգության նշանակության են։ Ադրբեջանից պաշտոնական մեկնաբանություններ դեռևս չեն հնչել։
Ինչպես հաղորդում է պակիստանյան The News International լրատվական գործակալությունը, Ֆագիրաբադ քաղաքի հյուրանոցի համարից 44 հազար ԱՄՆ դոլար արժողությամբ զանգեր են կատարվել Ադրբեջանի, Գերմանիայի, Սոմալիի, Սաուդյան Արաբիայի, Իսրայելի հեռախոսահամարներին։
Համաձայն Պակիստանի դաշնային հետաքննական գործակալության և ոստիկանության տվյալների՝ զանգերի մեծ մասը գրանցվել է Ադրբեջանի և Սոմալիի հեռախոսահամարներին։
Հայտնի է, որ զանգերը կատարվել են 20 հեռախոսագծերից, որոնք գրանցված են 3 անձանց վրա։ Այս մարդկանց նկատմամբ հետախուզություն է հայտարարված։
Հիշեցնենք, որ Պակիստանը համարվում է ահաբեկչական տարբեր խմբավորումների տեղակայման կամ պատսպարման տարածք։ Երկրում ակտիվ են հատկապես «Թալիբան» և «ալ Կաիդա» ահաբեկչական կառույցները։
Հետաքրքիր է այն հանգամանքը, որ նույնիսկ ադրբեջանական Haqqin.az կայքը, մեկնաբանելով տեղեկությունը, շեշտում է՝ հնարավոր է հեռախոսազրույցներն առնչություն ունենան ահաբեկիչների միջև բանակցությունների հետ։
Եթե այս վարկածը հաստատվի, ապա կստացվի՝ Ադրբեջանում ևս, ինչպես Սոմալիում և Պակիստանում, ահաբեկչական խմբավորումների ներկայացուցիչներ են պատսպարվում։