Ավարտվել է ՌԴ ԶՈւ կենտրոնական ռազմական օկրուգի գվարդիական համազորային բանակի տանկային միավորման վերազինումը Տ-72Բ3 արդիականացված տանկերով։
Տանկերի վերջին խմբաքանակն արդեն տրամադրվել է տանկային բրիգադին, ու շուտով տանկերը կմտցվեն սպառազինության մեջ ու կկցվեն անձնակազմին։ Մինչ այդ ընթացիկ տարվա առաջին կեսին տանկային բրիգադի անձնակազմը անցել էր վերապատրաստում ու ծանոթացել արդիականացված տանկին։
Տ-72Բ3 տանկը Ռուսաստանի Ալաբինո զորավարժարանում
Ընդհանուր առմամբ տանկային միավորմանը տրամադրվել է 150 միավոր Տ-72Բ3 տանկ։
Նորացված տանկի վրա տեղադրված է 840 ձիաուժանոց շարժիչ բազային 780 ձիաուժանոցի փոխարեն, «Կոնտակտ-5» արտաքին դինամիկ զրահ, բազմալիք «Սոսնա-Ու» նշանոց, կապի նորագույն սարքեր, սպառազինության կատարելագործված ստաբիլիզատոր ու զանգվածային ոչնչացման զենքից պաշտպանության համակարգ։ Կատարելագործվել են նաև ընթացամասն ու թրթուռները։ Բացի այդ տանկի սպառազինությունը թույլ է տալիս կիրառել զինամթերքի նոր, ավելի մեծ զրահահարությամբ տեսակներ։
Հիշեցնենք, որ Տ-72Բ3 տանկերով վերազինվում է նաև ՌԴ ԶՈւ արևմտյան ռազմական օկրուգը։ Վերազինումը սկսվել է ընթացիկ տարվա սեպտեմբերին։
Նշենք, որ ՌԴ ԶՈւ վերազինումը նախատեսված է ավարտել 2015-ի վերջին։ Արդյունքում ՌԴ ԶՈւ սպառազինությունից կհանվեն Տ-80 տանկերը, իսկ դրանց փոխարեն կտրամադրվեն Տ-72Բ ու Տ-90 տանկեր։