Բաքվում Իրանի դեսպանությունը որպես անհիմն պնդումներ է որակել Իրանի քաղաքացու նկատմամբ Ադրբեջանի մեղադրանքները լրտեսության համար։ Չնայած դրան՝ իրանցուն Բաքվում դատապարտել են ազատազրկման։
Բաքվի՝ ծանր հանցագործությունների գծով դատարանում հոկտեմբերի 11-ին ավարտվել է Իրանի քաղաքացի Ֆեյզի Բահրամ Հասան օղլուի գործով դատավարությունը՝ 15 տարվա ազատազրկմամբ։ Իրանի դեսպանության մամուլի ծառայության ղեկավար Մոհամմադ Այթոլլահին Բաքվի քայլն անվանել է «իրանաֆոբիայի հերթական դրսևորում»։ Այթոլլահին նաև հույս է հայտնել, որ վճռաբեկ դատարանը չեղյալ կհամարի մեղադրանքները։
Հիշեցնենք, որ Իրանի քաղաքացի Ֆեյզի Բահրամ Հասան օղլուն մեղավոր է ճանաչվել 2012-ի մայիսին «Եվրատեսիլի» երգի միջազգային մրցույթի նախօրեին Բաքվում Իսրայելի դեսպանատան դեմ ահաբեկչության պատրաստման գործում։ Ըստ Բաքվի հետաքննության տվյալների՝ նա համարվում է իրանական տեղեկատվության, անվտանգության և հետախուզության նախարարության («Էթթելաաթ») աշխատակից։
Ադրբեջանական աղբյուրների վկայությամբ՝ դատավարության ընթացքում Ֆեյզի Բահրամ Հասան օղլուն իրեն մեղավոր է ճանաչել, վկայել է, որ հետախուզական ուժերի ներկայացուցիչ է, 2006-ին Բաքու տեղափոխվելուց հետո աշխատել է «Էթթելաաթ»-ի համար։
Իրանը, սակայն, հերքում է այս տեղեկությունները։