ԱՄՆ պետդեպարտամենտը հայտարարել է, որ իրենք մտադիր են բավականին նվազեցնել Եգիպտոսի կառավարությանը ցուցաբերվող ռազմական օգնությունը՝ տարբեր պաճառներից ելնելով։
Բախումներ՝ Եգիպտոսում
Այս մասին հոկտեմբերի 9-ին հաղորդել է «Ռոյթերս» գործակալությունը։
Ընդ որում, վերանայվելու է Եգիպտոսին տրամադրվելիք Apache («Ապաչ») ուղղաթիռների, Harpoon («Հարփուն») հականավային հրթիռների, տանկերի բաղադրամասերի ծրագիրը։ Բացի այդ, ԱՄՆ-ն արդեն չեղյալ է համարել Եգիպտոսին տրամադրվող 260 մլն ԱՄՆ դոլարի չափով ֆինանսական օգնությունը։
ԱՄՆ–ն հիմնավորում է իր որոշումն այն հանգամանքով, որ Եգիպտոսում զինվորականների աջակցությամբ իշխանության եկած նոր կառավարությունը «կասեցրել է ժողովրդավարության զարգացումը երկրում»։
Հիշեցնենք, որ ԱՄՆ-ի՝ Եգիպտոսին տրամադրվող ռազմատնտեսական օգնությունը գնահատվում էր 1,3 մլրդ ԱՄՆ դոլար։ Լուրերը, որ ԱՄՆ-ն կասեցնելու է Եգիպտոսի համար նախատեսված ռազմական օգնությունը, պտտվում էին դեռևս հուլիսի 3-ից, երբ Եգիպտոսի նախագահ Մուհամմեդ Մուրսին գահընկեց արվեց։
Հուլիսի 24-ին ԱՄՆ նախագահ Բարաք Օբաման հայտարարել էր՝ դադարեցնում են ամերիկյան F-16 կործանիչների տրամադրումը Եգիպտոսին, իսկ օգոստոսի 15-ից չեղյալ է համարվելու «Վառ աստղ» անունը կրող ամերիկաեգիպտական համատեղ զորավարժությունները։ Սակայն Օբաման շեշտել էր՝ դեռևս չեն մտածում Եգիպտոսին ռազմական աջակցությունից լիովին զրկելու ուղղությամբ։
Հավելենք, որ օգոստոսի վերջին ամերիկյան լրատվամիջոցները, հղում կատարելով Սենատում և նախագահական աշխատակազմում սեփական աղբյուրներին, հաղորդել էին՝ իրականում Եգիպտոսին տրամադրվելիք ռազմական օգնության ծրագիրն ամբողջովին կասեցված է։ Պաշտոնական աղբյուրները մինչ օրս շարունակում են հերքել Եգիպտոսին ռազմական օգնության տրամադրման գործընթացի լիարժեք դադարեցման լուրերը։