ՀԱՊԿ «Անխախտ եղբայրություն-2013» զորավարժության ընթացքում մասնակից 6 երկրների զինծառայողները, այդ թվում նաև հայկական զորախումբը, գիշերային մարտի ժամանակ կանխել են հումանիտար օգնության բռնագրավումը զինված խմբավորումների կողմից։
ՀԱՊԿ անդամ-երկրներ
Խաղարկային գործողության ընթացքում պայմանական զինյալները ոչնչացվել են, իսկ նահանջող առանձին խմբերը՝ ձերբակալվել։ Խաղաղապահների գործողությունը կատարվել է ընդհանուր հրամանատարությամբ։ Այս մասին գրում է «Ռիա Նովոստի» կայքը՝ հղում անելով ՌԴ զինված ուժերի Կենտրոնական ռազմական օկրուգի հրամանատարի օգնական, գնդապետ Յարոսլավ Ռոշուպկինին։
Ըստ Ռոշուպկինի՝ զորավարժության սցենարի համաձայն՝ հումանիտար օգնության շարասյունը կանգնել է գիշերելու համար, իսկ հակառակորդի գերակշիռ ուժերը փորձել էին տիրել տեղափոխվող բեռին։ Մարտական հերթապահությունը, նկատելով նրանց, մարտ է սկսել։
Ռոպուշկինը նաև նշել է, որ գիշերային մարտերի ժամանակ տարածքը լուսավորվել է լուսավորվող ականներով, որոնք արձակվել են «Պոդնոս» և «Վասիլյոկ» ականանետերից։
Բացի այդ, զորավարժության հրամանատարի տեղակալ Ռամիլ Գիլյազովը ներկայացրել է զորավարժության կարևորությունը։
«Խաղաղապահները պետք է պատրաստ լինեն գործողությունների այսպիսի զարգացման։ Գիշերային մարտերն ռազմավարական գործողությունների ամենադժվար ձևերից են, երբ հրամանատարը շատ կարճ ժամանակում պետք է որոշում ընդունի և գործողությունների ընթացքը կառավարի»,- նշել է Գիլյազովը։
Հիշեցնենք, որ «Անխախտ եղբայրություն-2013» զորավարժությունն իրականացվում է ՌԴ Կենտրոնական ռազմական օկրուգի զինված ուժերի հրամանատար, գեներալ-գնդապետ Նիկոլայ Բոգդանովսկու ղեկավարությամբ։ Հայկական 50 հոգանոց զորախմբի հետ մասնակցում են նաև Բելառուսի, Ղրղզստանի, Ղազախստանի, Ռուսաստանի և Տաջիկստանի զորախմբերը։
Զորավարժությունն ընթանալու է հոկտեմբերի 7-11-ը Չելյաբինսկում։