Թուրքական կարճ հեռահարության զենիթահրթիռային համակարգը փորձարկվում է

Թուրքիայի զինված ուժերը փորձարկում են տեղական արտադրության կարճ հեռավորության զենիթահրթիռային համակարգը։ ՀՕՊ համակարգերի կրակային առաջին փորձարկումները հաջողությամբ են անցկացվել, տեղեկացնում է Թուրքիայի ռազմարդյունաբերական քարտուղարությունը։

Թուրքական կարճ հեռավորության զենիթային հրթիռի առաջին կրակային փորձարկումն անցկացվել է հոկտեմբերի 6-ին Թուզ լճի մոտակայքում գտնվող զորավարժարանում։

Թուրքիան սեփական զենիթահրթիռային համակարգը ստեղծել է 2011 թվականին Թուրքիայի ռազմարդյունաբերական քարտուղարության ղեկավարած «Ցածր հեռահարության հակաօդային պաշտպանության հրթիռային համակարգ» (HISAR-A) նախագծի շրջանակներում։ Ծրագիրն իրականացնում է թուրքական «Ասելսան» (Aselsan) ընկերությունը: Աշխատանքներին մասնակցել է մեկ այլ խոշոր թուրքական ռազմարդյունաբերական ընկերություն՝ «Ռոքեթսանը» (Roketsan)։

Դեռ հայտնի չէ, թե երբ է նախատեսվում ավարտել փորձարկումների փուլը, և ինչպիսի մարտավարատեխնիկական տվյալներ ունի թուրքական նոր զենիթահրթիռային համակարգը։