Թուրքիայում ՌԴ-ՆԱՏՕ համատեղ զորավարժություն է անցկացվում

ՆԱՏՕ-ի և Ռուսաստանի օդային տարածքի նախաձեռնության համագործակցության (CAI) զորավարժությունն ընդունել է Թուրքիան։ Ռազմաօդային ուժերի համատեղ վարժանքներն անցկացվում են Սամսուն-Սվազ (Սեբաստիա)-Տրապիզոն շրջանների և Սև ծովի օդային տարածքներում սեպտեմբերի 23-24-ը։

Զորավարժությանը մասնակցում են նաև Թուրքիայի քաղաքացիական օդանավակայանները, այդ թվում Անկարայի Էսենբողա օդանավակայանը, ինչպես նաև Դիարբեքիրում տեղակայված Միացյալ օդային գործողությունների երկրորդ կենտրոնը։

Զորավարժության նպատական է ահաբեկիչների կողմից քաղաքացիական օդանավերն օգտագործելու դեմ համատեղ գործողությունների մշակումը և քաղաքացիական ավիացիայի ներկայացուցիչների և զինծառայողների միջև համագործակցության զարգացումը։

Ռուսաստանից զորավարժությանը մասնակցում են 1 միավոր Տու-154 և 4 միավոր Սու-27 ռազմական ինքնաթիռներ։ Թուրքիան ներկայացված է 2 միավոր F-16 կործանիչներով, տեղեկացնում է Թուրքիայի ԶՈւ գլխավոր շտաբը։

ՆԱՏՕ-ի երկրների և Ռուսաստանի միջև նման զորավարժություններն անցկացվում են 2002 թվականին ձեռք բերված համաձայնության հիման վրա։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *