Հարվարդի համալսարանի գիտնականները սկսել են ուսումնասիրել իշամեղվի թռիչքի առանձնահատկությունները վատ եղանակային պայմաններում, որպեսզի ստացված գիտելիքներն ապագայում կիրառվեն անօդաչու թռչող սարքերի ստեղծման գործընթացում:
Ինչպես հաղորդում է BBC News լրատվական գործակալությունը, ուսումնասիրման համար ընտրել են հենց իշամեղուներին, քանի որ վերջիններս են կարող եղանակային ցանկացած, այդ թվում՝ խիստ քամու պայմաններում, անարգել թռչել:
Հարվարդի համալսարանի դոկտոր Սրիդհարթ Ռավիի խոսքերով՝ ամենաժամանակակից ԱԹՍ-ները, որոնց թևերի բացվածքը 25 սմ-ից քիչ է, ունակ չեն թռչելու նույնիսկ թեթև քամու պայմաններում: Միևնույն ժամանակ, միջատներից շատերի համար քամին խոչընդոտ չէ:
Նշենք, որ իշամեղուների թռիչքի յուրահատկությունները հետազոտվում են հատուկ պատրաստված, մեծ արագությամբ նկարող մի քանի տեսախցիկներով օժտված աերոդինամիկ խողովակում: Ստացված բոլոր տեսագրումներն ուսումնասիրվում են նաև դանդաղեցված տարբերակով: Մասնավորապես, գիտնականներին հետաքրքրում է, թե ինչպես է միջատը հարմարվում օդային հոսանքների հաճախակիության փոփոխություններին:
Ըստ տեսագրությունների՝ քամու արագացման դեպքում իշամեղուն նվազեցնում է թռիչքի արագությունը, որպեսզի դյուրին կերպով կանոնավորի թռիչքի հետագիծը՝ համապատասխանեցնելով օդային հոսանքների ուղղությանը: Պարզվել է նաև, որ իշամեղուն առավել զգայուն է քամու այն պոռթկմանը, որը շեղում է իր հետագիծը դեպի աջ կամ ձախ, քան դեպի ներքև կամ վերև:
Հավելենք, որ Հարվարդի գիտնականները պատրաստվում են առաջիկայում ուսումնասիրել այլ միջատների, այդ թվում՝ մեղվի թռիչքի բնութագրիչ գծերը, հատկապես երբ նա ծաղկափոշի է հավաքում: Չի բացառվում, որ ստացված արդյունքներն օգտագործվեն փոքր չափերի անօդաչու թռչող սարքերի նախագծման մեջ: