Սեպտեմբերի 17-ին Ադրբեջանի ռազմական, քաղաքական ու մտավորական վերնախավն այցելել էր Տերտերի շրջանի առաջնագիծ, որտեղ ՊՆ մամուլի խոսնակ Էլդար Սաբիրօղլուն անդրադարձել է նաև դիպուկահարների թեմային։
Սեյրան Օհանյանն ու ԵՊՀ ռեկտոր Արամ Սիմոնյանը
«Ադրբեջանը, Ադրբեջանի պաշտպանության նախարարությունը հրաժարվում են դիպուկահարներին հեռացնել առաջնագծից։ Մենք դա չենք անի, մինչև պատերազմը չավարտվի»։
Հիշեցնենք, որ դեռևս օգոստոսի վերջին Ադրբեջանի Մոբիլիզացիայի և զորակոչի պետական ծառայության շրջանակներում գործող «Ռազմահայրենասիրություն և մասնագետների պատրաստում» ՓԲԸ-ն տեղեկացրել էր՝ դիպուկահարների դասընթացները մեկնարկում են:
ԵՊՀ-ում դասախոսական կազմի և ուսանողության հետ հանդիպման ժամանակ ՀՀ պաշտպանության նախարար Սեյրան Օհանյանը պատասխանեց aysor.am–ի խնդրանքով անդրադարձավ Ադրբեջանի մամուլի խոսնակի հայտարարությանը։
«Ադրբեջանի ղեկավարությունը որդեգրել է մի այնպիսի քաղաքականություն, որ բանակցային գործընացի, տարբեր հանդիպումների ժամանակ լարվածություն է ստեղծում՝ դիպուկահարներ, դիվերոսիոն, հետախուզական խմբեր, որին, իհարկե, մենք համապատասխան պատասխան ենք տալիս»,- նշեց Օհանյանը։
Ըստ նախարարի՝ հայկական կողմը պատրաստ է հետ քաշել իր դիպուկահարներին։
«Մենք ասում ենք նորից` պատրաստ ենք անել այդ քայլն ու ստեղծել վստահության եզրեր: Մենք պատրաստ ենք հետ քաշել մեր դիպուկահարներին` ընդ որում առանց վախենալու: Մենք ի վիճակի ենք հակառակորդի ցանկացած կրակոցի դեպքում մեր հետ քաշված դիպուկահարներին մի քանի րոպեների ընթացքում դարձյալ հանել առաջին գիծ ու պատասխան հարված հասցնել: Այդ առումով մենք շարունակում ենք մնալ մեր տեսակետին, սա ոչ թե միակողմանի պարտադրանքի արդյունք է, այլ` ամենանորմալ քայլը, քանի որ առանց այս քայլի չենք կարող բանակցային գործընթացում փոխադարձ վստահության մթնոլորտում ունենալ երկխոսություն։ Իսկ ինչ վերաբերում է կանխարգելմանը կամ արժանի հակահարված տալուն, մենք այդ հարցում պրոբլեմ չունենք»,-վստահեցրեց Սեյրան Օհանյանը։