Ռուսական 18 միավոր «Վենա» ԻՀՀ-ների պատվիրատուն Ադրբեջանն է

«Վենա» անունը կրող 2Ս31 ինքնագնաց հրետանային համակարգը (ԻՀՀ) առաջին անգամ ցուցադրվել է IDEX-97 սպառազինության ցուցահանդեսին, որը կայացել է 1990-ականներին։

2Ս31 «Վենա» ԻՀՀ

2Ս31 «Վենա» ԻՀՀ

Նշենք, որ այդ ժամանակ «Վենա» ԻՀՀ-ն այդպես էլ պատվիրատուներ չունեցավ։

Ավելին, այն սերիական արտադրության չէր դրվում, մի քանի նմուշներ գտնվում էին ՌԴ տարբեր փորձարարական կենտրոններում։ Այնուհանդերձ, ոչ պաշտոնական աղբյուրների տվյալներով՝ ՌԴ ԶՈւ-ին տրամադրվել էր «Վենա»-ների որոշ խմբաքանակ։

Վերջին զարգացումների համաձայն՝ այս ԻՀՀ-ների արտադրության բնագավառում առաջընթաց է գրանցվել։

«Կուրգանմաշզավոդը» սկսել է 18 միավոր 2Ս31 «Վենա» ԻՀՀ-ի արտադրությունը, որոնց պատվիրատուն, համաձայն Անդրեյ Տարասենկոյի՝ զրահատեխնիկայի վերաբերյալ բլոգի, Ադրբեջանն է։

Ադրբեջանի պաշտոնական աղբյուրները դեռևս չեն արձագանքել այս տեղեկությանը։

Հիշեցնենք, որ ռուսական «Վեդոմոստի» պարբերականը դեռևս 2013-ի հունիսի սկզբներին տվյալներ էր հրապարակել։ Ըստ դրանց՝ Ադրբեջանը Ռուսաստանի պայմանագիր է կնքել՝ 94 միավոր Տ-90Ս տանկեր, 100 միավոր ԲՄՊ-3 հետևակի մարտական մեքենա, 18 միավոր «Մստա-Ս» ինքնագնաց հրետանային համակարգ, 18 միավոր «Սմերչ» համազարկային կրակի ռեակտիվ համակարգ, 18 միավոր «Վենա» ինքնագնաց հրետանային համակարգ և 6 միավոր «Բուռատինո»-ի արդիականացված տարբերակի՝ «ՏՕՍ-1Ա Սոլնցեպեկ» հրանետի ձեռքբերելու վերաբերյալ։

Ուստի, այն, որ արտադրվող 18 միավոր «Վենա» ԻՀՀ-ների պատվիրատուն Ադրբեջանն է, թերևս հավաստի տեղեկություն է։
Հավելենք, որ 2Ս31 «Վենա» ԻՀՀ-ն 120 մմ տրամաչափի հրետանային համակարգ է, ստեղծվել է ԲՄՊ-3-ի ամրաշրջանակի հիմքի վրա Պերմի գործարանում։

Այն նախատեսված է մինչև 13 կմ հեռավորության հակառակորդի կենդանի ուժի, հրետանային ու ականանետային մարտկոցների, հրթիռային համակարգերի, զրահապատ թիրախների, կրականետ համակարգերի և կառավարման կետերի ոչնչացման համար։ Ընդ որում, այն ունակ է ինքնակառավարել կրակը, ինքնուրույն իրագործել թիրախի նկատմամբ հետախուզություն ինչպես ցերեկը, այնպես էլ գիշերվա ժամերին, վարել դիպուկ կրակ դարանային դիրքերից, ուղիղ նշանառությամբ՝ առանց կրակային դիրքի նախապես պատարստման։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *