Երեկ՝ սեպտեմբերի 4-ին, Ադրբեջանի լրատվամիջոցները, հղում տալով Թովուզի շրջանի կենտրոնական հիվանդանոցից իրենց փոխանցած տվյալներին, գրում են «հայկական կողմից հրադադարի խախտման հետևանքով տուժած խաղաղ բնակչի մասին»։
Ըստ ադրբեջանական մամուլի՝ Բաքվի ժամանակով 18։00-ի սահմաններում Ալիբեյլի սահմանամերձ գյուղի 28-ամյա բնակիչ Մուսաև Ադիլ Վեքիլ օղլուն ուսի հատվածում հրազենային վանսվածք է ստացել՝ «գյուղի փողոցում զբոսնելու ընթացքում»։
Ադրբեջանի պաշտպանության նախարարությունը դեռևս որևէ մեկնաբանությամբ հանդես չի եկել։
Ռազմինֆոն հարցի առնչությամբ զրուցեց ՀՀ ՊՆ մամուլի քարտուղար Արծրուն Հովհաննիսյանի հետ։ Վերջինս հերքեց քաղաքացիական օբյեկտների և խաղաղ բնակիչների ուղղությամբ հայկական կողմից կրակելու պնդումները։ Ճիշտ հակառակը, Ադրբեջանն է պարբերաբար կրակի բացում խաղաղ բնակավայրերի ուղղությամբ. «Մենք բազմիցս զգուշացրել ենք Ադրբեջանին, որ իրենց կողմից հրադադարը պարբերաբար խախտելու դեպքում պատասխանելու ենք ըստ արժանվույն։ Երեկ, սեպտեմբերի 4-ին, վաղ առավոտից, ադրբեջանական կողմից շարունակաբար խախտվում էր հրադադարի ռեժիմը Մովսես ու Այգեպար գյուղերի ուղղությամբ։ Կեսօրին մոտ կրակն ավելի ինտենսիվ է դարձել, վնասվել է մեկ քաղաքացիական մեքենա, և հայկական կողմը հարկադրվածն է եղել պատասխան կրակով լռեցնել ադրբեջանցիներին։ Սահմանում լարվածության ողջ պատասխանատվությունն ադրբեջանական կողմի վրա է»։
Մեր կողմից տուժածների մասին հարցին Արծրուն Հովհաննիսյանը պատասխանեց, որ միջադեպից ոչ ոք չի տուժել։