Արագածոտնի մարզի Մուղնու Մեսրոպ Աշճյանի անվան հիմնական դպրոցում սեպտեմբերի երկուսին բացվեց զոհված զինծառայող կրտսեր սերժանտ Վարդան Օհանյանի անվան փառքի սրահը:
Մուղնու դպրոցի բակում նոր ուսումնական տարվա առաջին օրը վաղ առավոտից դպրոց շտապող աշակերտների հետ միասին դպրոց էին եկել նաև Արագածոտնի մարզպետ Սարգիս Սահակյանը, ՀՀ ՊՆ խորհրդական գեներալ-լեյտենանտ Մուրազ Սարգսյանն, ինչպես նաև Վարդան Օհանյանի հարազատներն ու ընկերները:
20-ամյա Վարդանը զոհվել էր 2012-ի հունիսի 5-ի լույս 6-ի գիշերը Հորադիզի դիրքերում` ադրբեջանական դիվերսիան հետ շպրտելու ժամանակ: Նա հետմահու պարգևատրվեց Արիության մեդալով, որից հետո որոշում կայացվեց իր անունով փառքի սրահ բացել իր իսկ սովորած դպրոցում:”>
«Փառք Վարդանին, փառք հայոց բանակին, փառք մեր սահմանը պահող հայ զինվորներին»,-սրահի բացման ժամանակ ասաց Արագածոտնի մարզպետ Սարգիս Սահակյանն, ում ֆինանսական աջակցությամբ էլ հնարավոր է դարձել փառքի սենյակի վերանորոգումն ու կահավորումը:
Դասասենյակում, որի պատերին փակցված են հայ ժողովրդի հերոսների լուսանկարներն ու նրանց կենսագրությունները և ներկայացված է բանակի պատմությունը, առանձնացված անկյունում կպահվեն Վարդանի անձնական իրերն ու լուսանկարները:
«Վարդանն այս դպրոցի լավագույն սաներից էր, այս դպրոցի հարկի ներքո հավերժ հնչելու է նրա փառքի ու անմահության ձայնը: Իր անվան դասարանում, որտեղ կանցկացվեն հայոց լեզվի և գրականության, հայոց պատմության ու եկեղեցու պատմության դասեր, սովորելու են երեխաներ, ովքեր անձամբ գիտեին Վարդանին որպես ընկեր, իսկ հիմա արդեն գիտեն որպես հերոս»,-ասաց դպրոցի տնօրեն Գրետա Համբարձումյանը:
Դպրոցի փոխտնօրեն Գայանե Ավետիսյանն էլ, ով նաև Վարդանի հայոց լեզվի և գրականության ուսուցչուհին է եղել, հիշում է, թե ինչքան բարի ու ընկերասեր երիտասարդ էր Վարդանը:
«Հավանաբար ի վերուստ է տրվում նման անձանց, որ քիչ են ապրում, բայց ապրում են հրաշալի կյանքով, ապրում են հասարակության ու ժողովրդի համար: Արտակարգ բարի անձ էր, եզակի իր հասակակիցների մեջ, բոլոր հանրօգուտ աշխատանքների մեջ առաջինն էր, և ընդհանրապես իր բնույթով բացառիկ պատանի էր, ափսոս, որ չհասցրեց վայելել երիտասարդությունը»,-ասում է ուսուցչուհին:
2 responses to “Մուղնու դպրոցում բացվել է զոհված զինծառայող Վարդան Օհանյանի անվան փառքի սրահը”