Ադրբեջանի «Դոկտրինա» ռազմական-լրագրողական հետազոտությունների կենտրոնը հրապարակել է երկրի պաշտպանական-անվտանգության համակարգի կորուստների մասին նոր տվյալներ։ Համաձայն այդ տվյալների՝ ընթացիկ տարվա սկզբից Ադրբեջանը տարբեր պատճառներով արդեն 64 զինծառայող է կորցրել, որից միայն 9-ը՝ «հայկական գնդակից»։ 55-ը ոչ մարտական կորուստներ են։
Ադրբեջանի սահմանապահ զորքերի զինվորական երդման արարողությունից
Ընդ որում, մինչ օրս որևէ նոր բան չի պարզվել Ջամշիդ Նախիջևանցու անվան ռազմական լիցեյի կուրսանտ Ռագիլ Արազխան օղլու Ամիքիշինևի մահվան առնչությամբ։ Հիշեցնենք, որ կուրսանտը մահացել էր 2013-ի մարտի 2-ին անհայտ հանգամանքներում։ Ադրբեջանի ՊՆ մամուլի ծառայության ղեկավարի տեղակալ Թեյմուր Աբդուլաևը միայն նշել էր, որ կուրսանտը «հանկարծամահ է եղել»։
Ըստ «Դոկտրինայի»՝ 2013-ի ութ ամիսների ընթացքում Ադրբեջանի ԶՈւ-ն գրանցել է 73 վիրավոր, որից ընդամենը 7-ը՝ «հայկական կողմից բացված կրակից», մեկը պայթել է ականի վրա։
Հավելենք, որ ՀՀ ՊՆ-ն բազմիցս անդրադարձել է ադրբեջանական կողմի՝ «հայկական գնդակից» սպանված զինծառայողների մասին տեղեկություններին՝ շեշտելով՝ հայկական կողմը չի խախտում հրադադարի ռեժիմը, իսկ Ադրբեջանի ՊՆ-ի հայտարարությունները՝ «հայերի բացած կրակի պատճառով սպանված» զինծառայողների վերաբերյալ, ապատեղեկատվություն են։ Ադրբեջանի մարտական և ոչ մարտական կորուստների իրական թիվը պարզելը գրեթե անհնարին է, քանի որ ադրբեջանական կողմը ոչ բոլոր կորուստների փաստերն է հրապարակում։