Արևմուտքը մեղադրում է Սիրիայի նախագահ Բաշար Ասադին օգոստոսի 21-ին քիմիական զենք կիրառելու համար, ինչի հետևանքով Սիրիայում մեծանում է արտաքին ռազմական միջամտության հավանականությունը։
Ռազմինֆոն նման ձևաչափով ներկայացնում է Սիրիայի շուրջ ստեղծված իրավիճակի վերաբերյալ տվյալ օրվա ուշագրավ իրադարձությունները։
20:02 ” Սիրիան կարող է հարվածներ հասցնել Թուրքիային, Կիպրոսին և Իսրայելին, եթե արևմտյան պետությունները ռազմական գործողություններ սկսեն երկրի դեմ:
Նման տեղեկություններ են տարածում թուրքական լրատվամիջոցները` հղում կատարելով սիրիական պետական լրատվամիջոցների տեղեկություններին:
***
19:55 ” Թուրքիայի զինված ուժերի ցամաքային զորքերի շտաբի պետ, գեներալ-լեյտենանտ Ույարն այցելել է Սիրիայի հետ սահմանին գտնվող զորամասեր: Այս մասին տեղեկացնում է թուրքական «Իհլաս» գործակալությունը:
Թուրք գեներալը գլխավորել է երեք ուղղաթիռից բաղկացած պատվիրակությունը, որը մի քանի կանգառ է արել Սիրիային մոտ գտնվող թուրքական ռազմաբազաներում և զորամասերում:
Ույարը ստուգել է զորքերի պատրաստվածությունը, ինչպես նաև ցուցումներ տվել հրամանատարությանը: