Օգոստոսի 18-ին Բաքվի ժամանակով 18։00-ի սահմաններում Ադրբեջանի ընդդիմադիր քաղաքական խմբավորումները, մասնավորապես, Ազգային խորհուրդը, քաղաքապետարանի արտոնությամբ ցույց էին կազմակերպել։
Զոհված զինվորի մայրը՝ ընդդիմության ցույցին
Ցույցն անցկացվել էր Բաքվի ծայրամասային Բաիլովո թաղամասում։
Տարբեր աղբյուրների համաձայն՝ ցույցին մասնակցում էին 3-5 հազար կամ 6-8 հազար քաղաքացիներ։ Ընդդիմադիր գործիչները նշում են 10 հազար ցուցարարների առկայության մասին։
Ցույցին պատրաստվել էին նաև ոչ մարտական պայմաններում կասկածելի հանգամանքներում զոհված կամ սպանված զինծառայողների մայրերը։ Ոստիկանությունը խոչընդոտել է իրենց զոհված որդիների լուսանկարներով դեպի ցուցարարները գնացող կանանց տեղաշարժը։
Համաձայն ադրբեջանցի օգտատերերի գրառումների ու լուսանկարների՝ կանանցից մեկն ուշագնաց է եղել։
Զինվորների մայրերին բռնությամբ ոստիկանական մեքենաներով տեղափոխել են ցույցի վայրից հեռու, ապա իջեցրել մեքենայից ու հեռացել։
Այնուհանդերձ, ցույցի լուսանկարներից երևում է՝ հանրահավաքին հաջողվել է մասնակցել ոչ մարտական պայմաններում սպանված զինվորների հայրերին։
Ցուցարարների մի մասը ևս զոհված զինվորների անուններ է վանկարկել՝ ներկա լինելով Ադրբեջանի ՊՆ-ի վարած քաղաքականության դեմ կոչեր կրող պաստառներով։
Հիշեցնենք, որ հուլիսի 30-ին «Դոկտրինա» լրագրողական-ռազմական հետազոտությունների կենտրոնի տնօրեն Ջասուր Սումերինլին հրապարակեց Ադրբեջանի բանակում տարվա սկզբից գրանցված մարդկային կորուստների ցուցակը, որտեղ ընդհանուր 58 զոհերից 49-ը ոչ մարտական պայմաններում զոհվածներն են։
Օգոստոսի առաջին օրերին ադրբեջանական սոցցանցային խմբերում ու էջերում քննարկումներ էին ընթանում ՊՆ-ին կամայականությունների ու բանակում զոհերի մեծ թվի դեմ նոր ցույց կազմակերպելու ուղղությամբ։