Օգոստոսի 15-ին Եգիպտոսի կառավարությունը տվյալներ է հրապարակել։ Ըստ դրանց՝ Եգիպտոսում զինվորականների ու գահընկեց արված նախագահ Մուհամմեդ Մուրսիի կողմնակիցների միջև բախումների հետևանքով զոհվել է ավելի քան 230 մարդ։
Բախումներ՝ Եգիպտոսում
Այս մասին տեղեկացնում է «Ալ Ջազիրան»՝ հղում կատարելով Եգիպտոսի առողջապահության նախարարությանը։
Սակայն AFP-ն ներկայացնում է նույն հայտարարությունը՝ վկայելով, որ զոհվածների թիվը 464 է։ Ընդ որում, 43-ը ոստիկանության աշխատակիցներ են, 421-ը՝ քաղաքացիական անձ։
Միևնույն ժամանակ «Մուսուլման եղբայրները» օգոստոսի 14-ին լիովին այլ տվյալներ են ներկայացրել՝ պնդելով, որ միայն սուր բախումների ժամանակ սպանվել է 2000 հոգուց ոչ պակաս։
Նշենք, որ ներկա դրությամբ բարդ է հստակ ասել՝ որ տվյալներն են համապատասխանում իրականությանը։ Դրանք բավականին հակասական են։
Հիշեցնենք, որ անկարգություններն ու ցույցերը մեկնարկել են, երբ ոստիկանական գործողություն է իրականացվել՝ նախկին նախագահ Մուրսիին Կահիրեի հրապարակից դուրս բերելու համար։ Ցույցին հավաքվածները դիմադրություն են ցույց տվել, ինչից հետո էլ բախումներ են եղել։
Հայտնի է միայն, որ Եգիպտոսի ժամանակավոր կառավարությունն արտակարգ դրություն է հայտարարել երկրի գրեթե ամբողջ տարածքում, իսկ Կահիրեում ու ևս 11 շրջաններում՝ պարեկային ժամ։
«Ռոյթերս» լրատվական գործակալության տվյալներով՝ հրաժարական տված վարչապետ Մուհամմեդ ալ-Բարադեյի կողմնակիցները սատարում են բանակին ու կողմ են վերջինիս գործողություններին։ Իսկ BBC-ի տվյալներով՝ Եգիպտոսի վարչապետի ժամանակավոր պաշտոնակատար Հազեմ Բեբլաուին նույնպես արդարացրել է բանակի գործողությունները՝ դրանք որակելով «անվտանգության վերահաստատմանն ուղղված անհրաժեշտություն»։
Հավելենք, որ ներկա դրությամբ երկրում ժամանակավոր անդորր է, բայց «Մուսուլման եղբայրները» արդեն հայտնել են այսօր նոր ցույց կազմակերպելու իրենց մտադրության մասին։