Այսօր՝ օգոստոսի 12-ին, ադրբեջանական «Թուրան» լրատվական գործակալության ներկայացուցիչները կապվել են Կարմիր խաչի միջազգային կոմիտեի (ԿԽՄԿ) Բաքվի մասնաճյուղի հետ։
Լրագրողները փորձել են պարզել՝ արդյոք ԿԽՄԿ-ն այցելել է օգոստոսի 8-ին ադրբեջանական կողմում գերի ընկած Հակոբ Ինջագուլյանին։
ԿԽՄԿ-ից տեղեկացրել են, որ «այցելություն դեռևս չեն կատարել»՝ հստակ չնշելով, թե երբ են պատրաստվում այցելել ՀՀ ԶՈւ զինծառայողին։ ԿԽՄԿ-ից չեն հայտնել նաև, թե ինչ տեղեկություն ունեն հայ գերու ինքնազգացողության մասին և արդյոք վերջինս «ցանկանում է մնալ Ադրբեջանում, վերադառնալ Հայաստան կամ անցնել երրորդ երկիր»։
Հիշեցնենք, որ օգոստոսի 7-ի լույս 8-ի գիշերը ժամը 3:00-ի սահմաններում ծառայությունն իրականացնելու ժամանակ, ըստ նախնական տեղեկությունների, տեղանքում չկողմնորոշվելու հետևանքով 1991 թվականին ծնված շարքային զինծառայող Հակոբ Գևորգի Ինջիղուլյանը, հատելով հայ-ադրբեջանական շփման գիծը, հայտնվել է հակառակորդի պահպանության տակ գտնվող տարածքում։
Օգոստոսի 9-ին ՀՀ պաշտպանության նախարարի առաջին տեղակալ Դավիթ Տոնոյանը պաշտոնապես դիմել է ԿԽՄԿ-ին, որպեսզի հավաստիացնեն Ինջիղուլյանին, որ տեղի ունեցած դեպքն իրավական հետևանքներ չի առաջացնի նրա համար, ինչպես նաև ադրբեջանական կողմի պատրաստակամության դեպքում ԿԽՄԿ ուժերով կազմակերպել և ապահովել ՀՀ քաղաքացու անվտանգ և շուտափույթ վերադարձը Հայաստան։
Բացի այդ, Ռազմինֆոյի հետ զրույցում օգոստոսի 9-ին երևանյան գրասենյակից հայտնեցին, որ դեռևս ոչ մի լուր չունեն։ Այն հարցին, թե երբ կլինի նորություն, Կարմիր Խաչի աշխատակիցը պատասխանեց, որ ամենայն հավանականությամբ հաջորդ շաբաթվա ընթացքում։