Պատժվել է 3 աֆղանների դիակներն անարգած ԱՄՆ զինծառայողներից վերջինը

Աֆղանստանում թալիբների դիակների նկատմամբ անարգանքի գործով անցնող Միացյալ Նահանգների ծովային հետևակի ութ զինծառայողներից վերջինը՝ սերժանտ Ռոբերտ Ռիչարդսը, կրել է իր պատիժը։

Պատիժը եղել է զինվորական կոչումն իջեցնելու տեսքով. Ռիչարդսը սերժանտից դարձել է կապրալ։

Հյուսիսային Կարոլինայում կայացած դատավարության ժամանակ վերջինս խոստովանել է իր մեղքը՝ ծառայության նկատմամբ անբարեխիղճ վերաբերմունքի և հրամանը չկատարելու հարցում։

Մեղադրող կողմի տվյալներով՝ հենց Ռիչարդսն է եղել սկանդալին վիդեոնկարահանման օպերատորը։

Հիշեցնենք, որ այս գործում մյուս մեղադրյալներն արդեն կրել են պատիժ։ Նրանցից  սերժանտներ Ջոզեֆ Չապլինն ու Էդվարդ Դեպտոլան դատապարտվել են ազատազրկման։

Հավելենք, որ 2011-ի հուլիսին Աֆղանստանի Հիլմենդ շրջանում այս երեք սերժանտները միզել էին սպանված 3 աֆղանների դիակների վրա։ Տեսանյութը համացանցում էր հայտնվել 2012-ի հունվարի 11-ին՝ մեծ աղմուկ բարձրացնելով։

Աֆղանստանի նախագահ Համիդ Քարզայն անվանել էր ԱՄՆ զինծառայողների արարքը «անմարդկային», իսկ ԱՄՆ պաշտպանության այն ժամանակվա նախարար Լեոն Պանետտան հրապարակայնորեն ներողություն էր խնդրել՝ խոստանալով ըստ արժանվույն պատժել մեղավորներին։

 

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *