Օգոստոսի 7-ին Եմենի բանակն ու հատուկ ծառայությունները կանխել են «ալ Ղաիդայի» զինյալների՝ նավթային տերմինալը, գազային հանքավայրը և արևելյան շրջաններից մեկի կենտրոնը գրավելու փորձը։
Եմենի կառավարության ներկայացուցիչ Ռաջի Բադին ասել է «Ռոյթերս» գործակալության թղթակցին, որ գրոհայինները ծրագրել էին օգոստոսի 11-ին լայնամասշտաբ հարձակում սկսել։
Ըստ նույն աղբյուրի՝ «ալ Ղաիդայի» զինյալները, կառավարական ուժերի սպայական ու շարքային զինվորների հանդերձներով, պետք է գաղտնի ներխուժեին Ալ-Դաբբա նավթային տերմինալի տարածք։ Միևնույն ժամանակ գրոհայինների մեկ այլ խումբ պետք է գրավեր Հադրամութ շրջանի Մուքալլա կենտրոնը։
Ստանալով այս տեղեկությունը՝ կառավարական ուժերը լրացուցիչ ուժեր կենտրոնացրին հարձակման հավանական կետերում։
Հիշեցնենք, որ օգոստոսի 6-ին Մեծ Բրիտանիան և ԱՄՆ-ն փակել էին իրենց դեսպանատներն ու տարհանել աշխատակիցներին՝ «ահաբեկչական գործողության սպառնալիքի մեծ հավանականության» պատճառով։