Հայաստանի և Թուրքիայի միջև սահմանին գրանցված միջադեպի վերաբերյալ նոր տեղեկություններ են հայտնի դարձել։
Հուլիսի 31-ին սահմանի այդ հատվածը հսկող ՌԴ ԱԴԾ սահմանապահ ուժերը կրակ էին բացել Թուրքիայից Հայաստանի տարածք անցնել փորձող Թուրքիայի 35-ամյա քաղաքացի Մուսթաֆա Ուլքերի վրա, ինչի պատճառով նա մահացել էր։
Թուրքական կողմը շտապել էր նշել, թե սահմանախախտը «սովորական հովիվ էր, ով անցել էր սահմանը՝ հետ բերելու իր անասուններին»։
Ռազմինֆոն օգոստոսի 1-ին կապ էր հաստատել ՌԴ ԱԴԾ սահմանապահ ուժերի Հայաստանի վարչության հետ, որտեղ տեղեկացրել էին, որ միջադեպ իրոք եղել է, ընթանում է հետաքննություն, որի ավարտից հետո կտրամադրվեն մանրամասներ։
Ռուսաստանյան ԻՏԱՌ-ՏԱՍՍ լրատվական գործակալությունը օգոստոսի 2-ին կապ է հաստատել հաստատել ՌԴ ԱԴԾ սահմանապահ ուժերի Հայաստանի վարչության մամուլի խոսնակ Սերգեյ Գրաչինի հետ, ով նշել է, որ Ուլքերը «կրակ է բացել ռուս սահմանապահների ուղղությամբ, ապա փորձել է խորանալ Հայաստանի տարածքում»։ Ռուս սահմանապահներն էլ պատասխան կրակ են բացել, որի հետևանքով էլ սահմանախախտը վիրավորվել է և մահացել։
Նշենք, որ Թուրքիայի ԱԳՆ ավելի վաղ պաշտոնական հայտարարությամբ էր հանդես եկել, որում նշել էր, թե «քննադատում է պատահականորեն սահմանն անցած քաղաքացու սպանությունը հայ սահմանապահների կողմից» և հավելել, թե «այս կապակցությամբ համապատասխան դիվանագիտական քայլեր են տարվում»։
Հավելենք նաև, որ թուրքական լրատվամիջոցներում և թուրք պաշտոնյաների խոսքերում չի նշվում, որ սահմանի այս հատվածն իրականում հսկվում է ՌԴ ներկայացուցիչների կողմից և մշտապես շեշտվում է, թե «թուրք հովիվին սպանել են հայերը»։