Ադրբեջանական ԱՊԱ լրատվական գործակալությունը, հղում տալով ԱՀ Ղազախի շրջանի ոստիկանական բաժանմունքին, տեղեկացնում է՝ իբր «հայերը կրակել ու վիրավորել են Գզլհաջըլը գյուղի բնակչին»։
Միջադեպը, ըստ նույն աղբյուրի, եղել է այն ժամանակ, երբ Ղազախի բնակիչ, 1984-ին ծնված Թուրալ Մուսա օղլու Մամեդովն իր «ԳԱԶել» 90 JP 024 ավտոմեքենայով ուղևորվում էր դեպի Աբբասբեյի լիճ։
Ադրբեջանական լրատվամիջոցը շեշտում է, որ «հայերի կրակոցներրի պատճառով» քաղաքացին վիրավորվել է մեջքի հատվածում։ Վիրավորին տեղափոխել են հիվանդանոց։ Փաստի առնչությամբ հետաքննություն է ընթանում։
Ռազմինֆոն վերոհիշյալ տեղեկության վերաբերյալ մեկնաբանություն ստացավ ՀՀ ՊՆ մամուլի քարտուղար Արծրուն Հովհաննիսյանից։ Վերջինս փաստեց, որ սա ադրբեջանական կողմի հերթական ապատեղեկատվությունն է, և հայկական կողմը կրակ չի բացել Ղազախի շրջանի ուղղությամբ։
Հավելենք, որ Ադրբեջանի պաշտպանության նախարարությունը և այլ գերատեսչություններ ևս միջադեպի առնչությամբ դեռևս պաշտոնական հաղորդագրությամբ հանդես չեն եկել։