Թայվանի պաշտպանության նախարար Գաո Հուաչժուն հրաժարական է տվել զորակոչիկի մահվան հետ կապված սկանդալի պատճառով։ Հրաժարականի մասին հուլիսի 29-ին պաշտոնապես հայտնել է երկրի վարչապետ Ցզյան Իհուան։
Թայվանի բանակը
Պաշտպանության նախարարի պաշտոնը կզբաղեցնի Էնդրյու Յանը, որը մինչ այդ գերատեսչության փոխնախարարի պաշտոնում էր։
Նշենք, որ նախկին նախարարը հրաժարվել է պաշտոնանկության պատճառները մեկնաբանելուց, սակայն տեղական լրատվամիջոցները վկայում են՝ պատճառը 24-ամյա զինծառայող Հուն Չժունցզյուի մահվան դեպքն էր։
Զինվորը մահացել էր հուլիսի 4-ին ջերմային հարվածից հետո։ Բացի այդ, մահվանից ժամեր առաջ նրան հարկադրել էին վարժանքներ կատարել արևի տակ՝ որպես պատիժ զորամասում տեսախցիկով սմարթֆոն կիրառելու համար։ Վարժանքների ընթացքում ուժասպառ լինելով՝ զինվորը ջուր է խնդրել, սակայն հրամանատարությունը կտրականապես արգելել է ջուր տալ նրան։
Դեպքի լուսաբանումից հետո հետաքննություն է սկսվել, որի արդյունքում 4 զինծառայող է ձերբակալվել՝ մահացած զինվորի հետ դաժան վարվելու մեղադրանքով, ևս 26-ի դեմ պատժամիջոցներ են սահմանվել։
Հավելենք, որ միջադեպը եղել էր զինվորի զորացրումից 3 օր առաջ։ Վերջինս արդեն 1 տարի ծառայել էր բանակում՝ այդ ընթացքում բազմիցս տարաձայնություններ ունենալով հրամանատարական կազմի հետ։
Զինվորի մահը պատճառ է դարձել, որպեսզի հազարավոր ցուցարարներ դուրս գան Թայվանի փողոցներ, մասնավորապես, պաշտպանության նախարարության շենքի մոտ։
Հիշեցնենք, որ Թայվանի նախագահն ու պաշտպանության նախկին նախարարն արդեն իսկ հրապարակավ ներողություն են խնդրել կատարվածի համար։