Օրվա ամփոփում. «2010թ. hրադադարը խախտվել է 5340, 2011թ.՝ 10397 անգամ». փորձագետ: «Թուրքիան Վրաստանի հուսալի բարեկամն է». Սահակաշվիլի

ՌԴ ԱԳՆ-ում հայկական և ռուսական կողմերը քննարկել են զենքի առևտրին առնչվող հարցեր: Պաշտպանության փոխնախարար Դավիթ Տոնոյանը գնահատել է, իսկ արցախցի ռազմական փորձագետը հանգամանալից ամփոփել է անցնող տարին:

  • «2011թ. ամրապնդվել են երկրի սահմանները, բարելավվել է մարտական հերթապահություն կատարող անձնակազմի ծառայության պայմանները, բարձրացել է անվտանգության մակարդակը:… Եթե առաջնագծում 2010 թ. 11 ամիսների ընթացքում արձանագրվել է հրադադարի 5340 խախտում, ապա այս տարվա նույն ժամանակահատվածում արձանագրվել է արդեն հրադադարի խախտման 10397 դեպք»,- ամփոփելով անցնող տարին՝ ասել է արցախցի ռազմական փորձագետ Սուրեն Սարումյան:
  • Հայկական ու ռուսական կողմերը ՌԴ ԱԳՆ-ում ներկայացրել են իրենց նկատառումները` կապված Զենքի առևտրի պայմանագրի բանակցությունների անցկացման, Եվրոպայում հակահրթիռային պաշտպանության համակարգի ստեղծման ծրագրի հետ:
  • ԵԱՀԿ Երևանյան գրասենյակի ղեկավարի պաշտոնակատար Կարել Հոֆստրայի հետ հանդիպման ժամանակ Դավիթ Տոնոյանը 2011թ.-ը արդյունավետ և կառուցողական է համարել բանակի համար՝ խոսելով տարվա ձեռքբերումներից և մատնանշելով հետագա անելիքները:

Տարածաշրջանային լուրերից.

«ՌԴ-ի և ԱՄՆ-ի միջև առկա հարաբերությունների համար որոշիչ նշանակություն կունենա  ամերիկյան գլոբալ ՀՀՊ համակարգի ստեղծման ծրագրի  վերաբերյալ մեր մտահոգությունները լսելու Վաշինգթոնի ունակությունը»,- հայտարարել է ՌԴ ԱԳ նախարար Սերգեյ Լավրովը՝ Թուրքիայում տեղակայվելիք ՀՀՊ համակարգը համարելով սպառնալիք Ռուսաստանի անվտանգության համար:

Այսօր արդեն իսկ իրանական աղբյուրներն են գրում՝ Թուրքիայում տեղակայված ՆԱՏՕ-ի ՀՀՊ ռադարային համակարգերի՝ մեկ շաբաթ հետո գործարկվելու մասին, իսկ իրանցի բարձրաստիճան պաշտոնյաները շարունակում են զգուշացնել Թուրքիային, որ անհրաժեշտության դեպքում Իրանը կհարվածի Թուրքիայում տեղակայված այդ համակարգերին: 

Թուրքական լրատվամիջոցների փոխանցմամբ՝ Թուրքիայի խորհրդարանի պատվիրակության հետ Թբիլիսիում կայացած հանդիպման ընթացքում Վրաստանի նախագահ Միխայիլ Սահակաշվիլին ասել է. «Թուրքիան օրեցօր ավելի որոշիչ դիրք է զբաղեցնում տարածաշրջանային եւ համաշխարհային քաղաքականությունում: Ձեր երկիրը Վրաստանի հուսալի բարեկամն է»:

«ԱՄՆ-ն կցանկանար սերտ համագործակցություն հաստատել ՌԴ-ի հետ՝ միջուկային սպառազինության համար ռադիոակտիվ նյութերի արտադրությունը կասեցնելու առումով»,- ասել է ԱՄՆ զինաթափման, համաձայնագրերի ստուգման ու պահպանման հարցերով ԱՄՆ պետքարտուղարի տեղակալ Ռոուզ Գետեմյուլլերը:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *