«Ստոկհոլմի խաղաղության միջազգային հետազոտությունների ինստիտուտը» (SIRPI) հրապարակել է զեկույց, ըստ որի Ադրբեջանի ռազմական ծախսերը 2020 թվականին աճել են 17 տոկոսով՝ կազմելով ՀՆԱ–ի 5.4 տոկոսը։ Հայաստանի ռազմական ծախսերը նվազել են 2.6 տոկոսով, որը կազմել է ՀՆԱ–ի 4.9 տոկոսը։
Զեկույցին կարող եք ծանոթանալ այստեղ։
ՀՆԱ–ի համեմատ ռազմական ծախսերով Ադրբեջանն ու Հայաստանը համապատասխանաբար 6 և 8–րդ հորիզոնականում են իրենց 5.4 և 4.9 տոկոս ցուցանիշով։ Այս առումով առաջատարը Օմանն է, որը ռազմական ոլորտում ծախսել է ՀՆԱ–ի 11 տոկոսը։ Իսկ նախորդ տարվա ցուցանիշներով Ադրբեջանը ռազմական ոլորտում ծախսել էր ՀՆԱ–ի 4 տոկոսը, Հայաստանը՝ 4.9 տոկոսը։
Ադրբեջանը 2020թ․ պաշտպանության ու ազգային անվտանգության համար ընդունել էր 3 մլրդ 853 մլն մանաթ (~2 մլրդ 271 մլն ԱՄՆ դոլար՝ 2019–ի նոյեմբերի փոխարժեքով ) հատկացնելու օրենք, ինչը 2019 թվականի ~3 մլրդ 187 մլն մանաթից ավելի էր 20.9 տոկոսով։
Սակայն 2021 թվականի փետրվարին հրապարակված 2020 թվականի բյուջեի կատարողականից պարզ է դառնում, որ Ադրբեջանի ռազմական ծախսերը կազմել են 4 մլրդ 426,8 մլն մանաթ (~2 մլրդ 604 մլն ԱՄՆ դոլար՝ փետրվարի 10-ի փոխարժեքով), ինչը ~12,9 տոկոսով ավելի է 2019թ. հաստատված բյուջեի պաշտպանական ծախսերից և ~14 տոկոսով էլ ավելի է 2020թ. ընթացքում կորոնավիրուսի հարուցած վնասների պատճառով կրճատված բյուջեով նախատեսված պաշտպանական ծախսերից։
Նշենք, որ 2019 թվականին նույնպես Ադրբեջանի ռազմական ծախսերը գերազանցել էին բյուջեով հաստատվածից։
Ինչ վերաբերում է Հայաստանի ռազմական ծախսերին, նշենք, որ որոշվել էր 2020 թվականի համար պաշտպանության ոլորտի ծախսերին հատկացնել 307 մլրդ 236 մլն դրամ, որից ռազմական պաշտպանությանը՝ 302 մլրդ 877 մլն դրամ (~644 մլն դոլար 2020թ․ դեկտեմբերի փոխարժեքով): Հաստատված բյուջեն 3 մլրդ դրամով ավելին էր, քան նախորդ տարվա ռազմական բյուջեն։ Սակայն 2020 թվականի բյուջեի կատարողականի ամբողջական հաշվետվությունը այս պահին անհասանելի է, ուստի դեռ հնարավոր չէ ստանալ վերջնական պատկեր։