Մարտի 1-ին ԱՄՆ պաշտպանության նախարարությունը (Պենտագոն) հայտարարել է Ուկրաինային 125 մլն ԱՄՆ դոլարի ծավալով ռազմական օգնության նոր փաթեթ տրամադրելու մասին։ Փաթեթը ֆինանսավորվել է ԱՄՆ «Արտաքին ռազմական ֆինանսավորում» ծրագրով։
Այս մասին ճեպազրույցի ժամանակ հայտնել է Պենտագոնի մամուլի քարտուղար Ջոն Քիբրին։ Ըստ նրա՝ հատկացված գումարով Ուկրաինան ձեռք է բերելու ևս 2 միավոր Mark VI պարեկային նավ՝ դրանց թիվն իր նավատորմում հասցնելով 8-ի։
2021 թ․ ֆիսկալ տարվա համար Ուկրաինային տրամադրվելու է ևս 250 մլն դոլար ռազմական օգնություն՝ «Ուկրաինայի անվտանգության աջակցության նախաձեռնություն» (USAI) ծրագրի շրջանակներում։ Սակայն այդ օգնության մի մասը՝ 150 մլն դոլարը, կտրամադրվի այն ժամանակ, երբ հաստատվի Կիևի ռազմական բարեփոխումների բավարար արդյունավետությունը։