Թուրքական «Աթաք» ուղղաթիռների արդիականացված տարբերակը մտել է սպառազինություն

«Թուրքական ավիաշինական արդյունաբերություն» (թուրք.՝ TAI) ընկերությունն առաջին արդիականացված «Աթաք» (T129 ATAK FAZ-2) հարվածային ուղղաթիռներն է մատակարարել Թուրքիայի ոստիկանությանը և ցամաքային զորքերին:

Այս մասին տեղեկանում ենք Թուրքիայի պաշտպանական արդյունաբերության գլխավոր վարչության (ՊԱԳՎ) (թուրք.՝ SSB) պետ Իմսայիլ Դեմիրի թվիթերյան գրառումից: Նա նշել է, որ ոստիկանությունն առաջին անգամն է ստանում «Աթաք» ուղղաթիռներ։

Մատակարարումների առաջին փուլում կտրամադրվի 21 միավոր ուղղաթիռ:

Արդիականացված «Աթաք» հարվածային ուղղաթիռը հագեցած է լազերային ցոլքի ցուցիչով, ռադիոլոկացիոն ճառագայթահարման մասին նախազգուշացնող ընդունիչով և ռադիոէլեկտրոնային պայքարի այլ համակարգերով: 

Հիշեցնենք, որ «Աթաք»-ի արդիականացված տարբերակի առաջին թռիչքն իրականացվել էր 2019 թ. նոյեմբերի 13-ին: Այն ժամանակ նշվում էր, որ զինված ուժերին առաջին մատակարարումները սպասվում են 2020թ. կեսերին, սակայն դրանք, ամենայն հավանականությամբ, հետաձգվել էին։

T-129 «Աթաք» հարվածային ուղղաթիռի ՄՏԲ.

  • Թռիչքի առավելագույն արագությունը՝ 269 կմ/ժ,
  • Առավելագույն բեռնատարողությունը՝ 1200 կգ,
  • Թռիչքի առավելագույն բարձրությունը՝ 6 կմ,
  • Գործողության իրականացման առավելագույն բարձրությունը՝ 3 կմ,
  • Մեկ լիցքավորմամբ հաղթահարվող տարածությունը՝ 561 կմ:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *