ԱՄՆ-ն գնել է Թուրքիայի համար նախատեսված F-35 կործանիչները

ԱՄՆ ռազմաօդային ուժերը ձեռք կբերի Lockheed Martin ընկերության կողմից Թուրքիայի համար արտադրված 8 միավոր F-35A կործանիչները, քանի որ Թուրքիան 2019թ. պաշտոնապես հեռացվել է ամերիկյան այս կործանիչների արտադրության ծրագրից։

Ընկերության հետ ստորագրված պայմանագրի մասին գրված է Պենտագոնի պաշտոնական կայքում։ Գործարքը գնահատվում է մոտ 862 մլն դոլար։ Ըստ գործարքի՝ նախատեսվում է ևս 6 միավոր F-35A-ի գնում ՌՕՈւ համար, ինչպես նաև Թուրքիայի համար նախատեսված կործանիչների մոդիֆիկացումը՝ ամերիկյան օդուժին համապատասխանեցնելու համար։

Հիշեցնենք, որ Թուրքիան հանդիսանում էր F-35 կործանիչների արտադրության ծրագրի 9 անդամ երկրներից մեկը, սակայն 2019թ. հուլիսին ռուսական Ս-400 ՀՕՊ համակարգերի գնման համար ԱՄՆ-ն պաշտոնապես հայտարարեց Թուրքիային ծրագրից հեռացնելու մասին։

Թուրքիան նախատեսում էր ձեռք բերել մոտ 100 միավոր F-35։ Մի քանի միավոր Թուրքիայի համար արդեն արտադրվել էր, սակայն դրանք շարունակում էին մնալ ԱՄՆ֊ում, քանի որ Արիզոնա նահանգի Լյուկ ավիաբազայում թուրք օդաչուներն անցնում էին կործանիչի պատրաստումներ։ Թուրքիային ծրագրից հեռացնելու մասին հայտարարությունից հետո օդաչուների պարապունքներն ԱՄՆ֊ում ևս դադարեցվեցին, և նրանք վերադարձան Թուրքիա։ Իսկ Թուրքիայի գնած մի քանի միավոր կործանիչների ճակատագիրը մոտ մեկ տարի հարցականի տակ էր։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *