Դանակահարություն Ադրբեջանի բանակում: Ինքնասպանության փորձ՝ հոսպիտալում: Զորակոչիկը մահացել է վթարից: Ադրբեջանի մամուլի անդրադարձը՝ Ռազմինֆոյի հրապարակմանը: Մեկնարկել է զորակոչը: Սաֆար Աբիևը խնդրում է վերացնել 907-րդ բանաձևը: ԿԽՄԿ այցելություն՝ Ադրբեջանի ռազմագերուն: Հրդեհ՝ զինավանում: Ռազմական ընդդիմության ձևավորում:Ադրբեջանը պարգևատրել է թուրք գեներալին: Իլհամ Ալիևն ընդունել է: Ադրբեջանը՝ ՌԴ ռազմածովային ցուցահանդեսին:
1. Հուլիսի 1-ին Ադրբեջանի ԶՈւ Շամխորի կորպուսի զորամասերից մեկում գրանցվել է դանակահարության դեպք. 19-ամյա շարքային Իլքին Հուսեյնովը դանակով հարվածներ է հասցրել իր ծառայակից 19-ամյա Հադիր Իսմայիլովին։
Հուլիսի 1-ին Ադրբեջանի ՊՆ Կենտրոնական զինվորական կլինիկական հոսպիտալում անհայտ անձն ինքնասպանության փորձ է արել: Դրդապատճառները հայտնի չեն, պաշտոնական հայտարարություններ չեն արվել:
Ադրբեջանական լրատվամիջոցները հաղորդում են, որ հուլիսի 5-ին 08։00-ի սահմաններում Լենքորանի շրջանի Լիման քաղաքի ճանապարհին ավտովթար է եղել, որի պատճառով մահացել է «ՎԱԶ-2107»-ի ուղևոր, 18-ամյա Ամրահ Հեյդարովը: Վերջինս զորակոչիկ էր և մեկնում էր Ադրբեջանի Մոբիլիզացիայի ու զորակոչի պետական ծառայության Լենքորանի զինկոմիսարիատ։
Հետևելով ադրբեջանական «Դոկտրինա» կենտրոնի հրապարակած տվյալներին՝ նշենք, որ հուլիսի 6-ի դրությամբ՝ Ադրբեջանում տարվա կտրվածքով կա 51 զոհ, 63 վիրավոր։
2. Ռազմինֆոյի՝ 2012-ին ՀՀ ՊՆ շենքում ռազմարդյունաբերական ցուցահանդեսի ժամանակ ներակայացված գերմանա-ֆրանսիական հակատանկային հայտնի «ՄԻԼԱՆ» (MILAN) հակատանկային կայանի մասին հրապարակմանն անդրադարձներ են ադրբեջանական ԱՊԱ լրատվական գործակալությունը, «1news.az» ու Aze.az ադրբեջանական կայքերը, ինչպես նաև ադրբեջանական համացանցային ֆորումները։
Գերմանա-ֆրանսիական «MILAN» հակատանկային հրթիռային կայան։
3. Համաձայն Ադրբեջանի հանրապետության նախագահ Իլհամ Ալիևի՝ 2013-ի հունիսի 4-ին ստորագրած հրամանագրի՝ հուլիսի 1-ին Ադրբեջանում մեկնարկել է ԶՈւ զորակոչը, որը շարունակվելու է մինչև հուլիսի վերջ։
Հուլիսի 2-ին Ֆարկոսի հետ հանդիպում է ունեցել Ադրբեջանի պաշտպանության նախարար Սաֆար Աբիևը՝ խնդրելով «վերացնել 907-րդ փոփոխությունը, որը խոչընդոտ է հանդիսանում երկու երկրների միջև առավել սերտ համագործակցություն սահմանելու գործընթացում»։ Համաձայն 1992-ի հոկտեմբերի 24-ին ստորագրած «Ադրբեջանին ցուցաբերվող աջակցության սահմանափակում» («Restriction on Assistance to Azerbaijan» ) 907-րդ բանաձևի՝ ԱՄՆ-ն կարող է աջակցություն ցույց չտալ Ադրբեջանին, մինչև նախագահի կողմից որոշում ընդունելն ու Կոնգրեսին զեկուցելը, որ Ադրբեջանի կառավարությունը ձեռնարկում է փաստարկված քայլեր՝ Հայաստանի նկատմամբ կիրառվող շրջափակումները և ուժի կիրառումը դադարեցնելու ուղղությամբ։
4. Հուլիսի 1-ին հայտնի է դարձել, որ Կարմիր խաչի միջազգային կոմիտեի (ԿԽՄԿ) ներկայացուցիչներն այցելել են Հայաստանում պահվող ադրբեջանցի ռազմագերուն՝ Ֆիրուզ Միրզա օղլու Ֆարաջովին։ Վերջինս, 2012-ի հուլիսի 26-ին Թովուզի շրջանից հատելով ՀՀ սահմանը, ինքնակամ գերի էր հանձնվել հայ սահմանապահներին` սպիտակ դրոշը ձեռքին:
5. Ադրբեջանի Գանձակ քաղաքի N38 զինավանում բռնկված հրդեհի արդյունքում վառվել է ու վնասվել ընդհանուր առմամբ 500 մ² տարածք։ Հրդեհից տուժածներ չկան։
6. Հուլիսի 1-ին Ադրբեջանի նախագահ Իլհամ Ալիևն ընդունել է ԱՄՆ պաշտպանության նախարարի՝ Ուկրաինայի, Ռուսաստանի և Եվրասիայի գծով տեղակալ Էվելին Ֆարկոսին` քննարկելով Ադրբեջանի զինվորների ծառայությունը միջազգային խաղաղապահ առաքելության շրջանակներում:
7. Ադրբեջանի Դեմոկրատական կուսակցության ղեկավար Սարդար Ջալալօղլուն հայտարարել է, որ չի բացառում Ադրբեջանում այսպես կոչված «ռազմական ընդդիմության» ձևավորումը, որի շարքերում կարող են ընդգրկվել ուժային ու պաշտպանական կառույցների ներկա և նախկին աշխատակիցներ, որոնք իշխանությունների կողմից պարբերաբար ենթարկվել են հետապնդումների։
8. Հուլիսի 3-ին Սանկտ Պետերբուրգում մեկնարկել է երկու տարին մեկ անգամ անցկացվող Վեցերորդ միջազգային ռազմածովային ցուցացահանդեսը (MBMC-2013), որին Ադրբեջանը ներկայացնում է ջեռուցման ու կոյուղու սարքավորումների արտադրության բնագավառում մասնագիտացած «Sənayecihaz» ձեռնարկությունը:
9. Թուրքիայի ԶՈւ ցամաքային զորքերի հրամանատար, բանակի գեներալ Հայրի Քըվրըքօղլուն Ադրբեջանում պարգևատրվել է ԱՀ ԶՈւ «Ռազմական համագործակցության բնագավառում ունեցած վաստակի համար» և «95-ամյակ» մեդալներով։
ՌԱԶՄԱՇԱԲԱԹԸ՝
Հայաստանում՝ այստեղ
Թուրքիայում՝ այստեղ